Indian National binadil nin riding in tandem criminal sa Guinobatan

GUINOBATAN, Albay -- Sarong Indian National, na nabisto sa pangaran na Durleep Singh Brar, na residente kan Doña Maria Subd., Brgy. Tagas, Daraga, Albay an binadil kan dai nabistong mga lalaki na nakalunad sa motorsiklo.

An incidente nangyari kasuodmang poco mas o menos alas 10:50 nin aga, sa Brgy. Banao, sa banwaan na ini.

Sabi kan imbestigador, sarong concerned citizen an nagreport sa Guinobatan MPS, dapit sa krimen.

Nagluluwas sa pag siyasat kan pulis na an biktima nakalunad sa motorsiklo kan siya hipaan kan dai nabistong mga tawo, na nakasakay man sa motorsiklo.

Tulos binadil kan mga suspechado an biktima na tinamaan nin bala sa saiyang lawas.

Nin huli kaini, idinalagan si Brar sa hospital asin pigbubulong ngonian.

Mayo pa nin makapagsabi kun sisay an mga kriminal na imbuelto sa incidente.

Siring man, pig sisiyasat pa kan pulis kun ano an motibo kan pangyayari.