Sunday, August 12, 2018

Concepcion Criminal Gang, nakasagupa kan pulis sa CSur

Stock image from Pixabay
NAGA CITY (Bicol Standard) -- Nagka sagupa guiraray kasubagong aga (alas 6:30) an mga pulis asin an mga miembros kan notorious na Concepcion Criminal Group sa banwaan kan Bato, Camarines Sur.

An Concepcion Criminal Group (CCG) bisto sa Bicol na an mga miembros "gun for hire", sabi sa report kan pulis.

Susug sa despacho na pinadara ni Chief Inspector Maria Luisa Calubaquib, an spokesperson kan PNP Bicol, an mga miembros kan police mobile forces kan Camarines Sur an nagpapatrolya sa lugar kan masabatan ninda an 10ng mga miembros kan criminal group sa Brgy. Del Rosario, kasubagong aga.
Naglawig nin 20 minutos si ribayan nin putok.

Idinagdag sa report na may mga miembros kan CCG an nalugadan sa baradilan.

an mga pulis naka recover sa pinangyarihan kan encounter nin M4 Colt rifle, tulong handguns, mga bala kan M16 rifle, 9mm asin .45 caliber pistols asin cellphones.

Sinabi pa sa report, an 10ng mga armadong lalaki iyo si parehong grupo na nakalaban kan mga pulis kan Viernes sa Brgy. Along-ong, Libon, Albay. Pakalihis nin pirang minutos na baradilan, nagdulag sinda pasiring sa banwaan kan Bato, Camarines Sur.

Mientrastanto, an mga pulis sa kataid na banwaan kan Libon, Albay digdi sa Camarines Sur nag bugtak nin mga checkpoints tangani na mahipaan si mga nagdudurolag na mga miembros kan Concepcion Criminal Group.

Afuera kan mga check points, linibot man kan mga awtoridad an mga hospitals na harane sa lugar para isihon kun igwang dinara saindang paciente, na may tama nin bala, nin huli kan baradilan kan Viernes.
Share:

Featured Post

DepEd to probe Bicol Central Academy schoolbag burning incident

NAGA CITY (Bicol Standard) – DepEd Sec. Leonor Briones has directed DepEd Regional Director Gilbert Sadsad to submit an incident repo...