Sunday, August 26, 2018

4 katawo binadil ngonian sa Masbate, gabos gadan



MASBATE CITY (BICOL STANDARD) — Apat (4) na tawo an binadil, gadan sa duwang separadong krimen na nangyari kasubago (Aug 26), sa Provincia kan Masbate.

Segun sa report, alas 12:35 kasubago, si Ret. SPO2 Rommel Borromeo y Genova, 58 anyos, dating Intel Operative kan RMFB5, asin si Antonio Barsaga y Cantoria, 65 anyos, retiradong security guard, an inambush sa Sitio Danta, Brgy. Calipatan, San Jacinto, Masbate.

Dai nabisto an mga imbuelto sa pag gadan sa mga biktima, alagad, pig tutubodan na mga miembros kan New People's Army (NPA).

Sabi kan mga imbestigador, hinapaan an mga biktima sa dalan, kan dai aram na numero nin mga rebelde, dangan pinabuag an bomba na itinaon sa agihan.

Pakatapos nin makusog na pagputok kan bomba, nagpa-arakasak nin badil an mga NPA, na iyo an naging causa kan kagadanan ninda Borromeo asin Barsaga.

Tinadtad nin bala an saindang lawas na naging causa kan saindang kagadanan.

Inabotan kan mga pulis na nagkakarigos sa saindang dugo an mga ginadan.

Mientrastanto, idinagdag kan mga imbestigador na sa lugar man na ini inambush si PO3 Noly Bartolay, kan Abril 16, 2018. 

Kan Mayo 6, 2018, may makusog na bomba an pinaputok sa kapareyong lugar.

May nakuang 52 na capsula nin bala an mga awtoridad hale sa 5.56mm, 10ng pidaso nin 5.56 na dai nagbutok na bala; asin 55 metros na color itom na TW detonating wire, sa pinangyarihan kan krimen.

Liga kan mga barangay President, kaiba, binadil man, pareyo gadan.

Mientrastanto, binadil man kasuodma an duwa pang lalaki sa Brgy. Daraga, Placer, Masbate.

Nangyari ini alas 6:00 nin bangui, ngonian.

An mga biktika iyo sinda Rommie Bagaan, asin si Eric Tupas, Punong barangay kan Brgy. Luna, Placer, Masbate, asin iyo an Presidente kan Liga ng mga barangay sa banwaan kan Placer, Masbate.

Dai nabisto an duwang lalaki na nagbadil sainda.

Segun sa imbestigador an mga biktima nakalunad sa motorsiklo, hale sa Poblacion, Placer, pasiring sa Brgy. Daraga, kan inabayan sinda nin duwa man na lalaki, na nakalunad man sa motorsiklo.

Kan matungodan na an mga biktima kan mga kriminal, bigla na sana sindang binadil asin tinamaan sa man laen-laen na parte kan saindang lawas.

Nagadan si Bagaan asin Tupas sa lugar na pinangyarihan kan krimen.

Pig aaram pa kan pulis kun ano an motibo kan pag gadan sa sainda.
Share:

Featured Post

Alfelor vs. Alfelor

IRIGA CITY — “Panahon ta na ini.” (This is our time.) This was the first statement issued by Emmanuel "Nonokoy" Alfelor, Jr. ...