Monday, August 27, 2018

2ng ginadan sa Albay, dai pa bisto an suspechado


CAMALIG, Albay 8/27/18 - (BICOL STANDARD) Blanko pa an pulis sagkod ngonian kun sisay an mga suspechado sa duwang magkasunod na pambabadil na nagresulta sa pagkagadannin duwang tawo digdi kan Viernes asin Sabado, kan nagtalikod na semana.

An enot na binadil iyo si Roberto Montecalbo y Manzanero, tanod sa Brgy. Magogon, na ginadan kan Viernes na bangui.

Sabi ni PSI Alan Concepcion, Deputy Chief of Police digdi, na hasta ngonian nagtitipon pa sinda nin mga evidencia sa nangyaring krimen.

An pamilya kan biktima may declarasyon sa pulis na  nagluwas sa saindang harong si ama ninda ta may nag-aapod kan saiyang pangaransa luwas kan saindang residencia.

Pirang minutos sana an nakalihis, nakadangog sinda nin surunod na putok nin badil.

Dai naghaloy naaraman ninda na si saiyang ama iyo palan an tinadtad nin bala.

May tama sa payo asin lawas an saiyang ama, na iyong ikinagadan.

Sa saro pang krimen, binadil man si Apolinario Blazo na taga Brgy. Del Rosario, digdi.

An mga nagsisiyasat kan mga casong ini nagsabi na dai pa sindang mga evidencia na pwedeng makatukdo kun sisay an responsable sa krimen.

Pig aaram ngonian  kan mga awtoridad kun an serye nin garadanan digdi iyo an resulta kan nag-iinit na ralaban kan mga soldados asin pulis kan gobierno kalaban an mga rebeldeng miembros kan New People's Army (NPA).

Kan nakalihis na semana, duwang soldados an binadil, gadan, sa Brgy. Panoypoy sa banwaan na ini.

May  saro pang civilian an ginadan pakalihis sana nin duwang aldaw. (Ni Vince Villar)
Share:

Featured Post

Quack dentist arrested in Naga City

Photo courtesy of Dr. Albeus NAGA CITY (Bicol Standard) – A person believed to be a quack dentist was arrested by authorities as he was...