Monday, July 2, 2018

'Task force Rapinan,' nag-iimbestigar pa


BAAO, CSur (Bicol Standard) -- Nagpaturo na sana kan saindang luha an nabayaan na familia ni Jeraldyn Rapinan, an babae na na nakuang gadan sa San Fernando, Camarines Sur, na itinapok sa guilid kan tinampo.

Maroromdoman na an biktima, taga San Jose, Baao, Camarines Sur nakua an lawas na malipot nang bangkay, asin hasta ngonian mayo pang malinaw na informasyon kun sisay an responsible sa krimen.

Si Jeraldyn, na mas bisto sa gaha na Ai-Ai sa saindang barangay, dinamayan sagkod na siya ilubong kan ginatos na mga paryentes, kahimanwa asin simpatisaror sagkod na an saiyang hawak ilaog sa nitso sa Cementeryo kan mga Katoliko sa banwaan na ini.

Segun sa saiyang familya, hasta ngonian nag hahagad pa guiraray sinda nin tabang sa sisay man na pwedeng makakatao nin informasyon sa mga awtoridad tangani na makua an justicia sa marigsok na nangyari.

An mga magurang kan biktima nag-tatangis mantang nagaarang sa Kagurangnan na makamtan man lugod ninda an ma-ulyas na maray na justicia.

Mientrastanto, an mga awtoridad mayo pa nin malinaw na pahayag kun ano na an pugol nindang evidencia.

An natukahan na mag gibo kan hararom na pag-siyasat iyo an Task Force Rapinan, na tinugdas mayormente para panginotan an imbestigasyon.

Sa pakipag olay kan Bicol Standard ki P/Supt Venerando Ramirez, an spokesman kan PNP Provincial Office sa Camarines Sur, sinabi kaini na kaipohan ninda an dagdag pang panahon para maseguro na an casong saindang isasangat, may magabat na evidencia na pwedeng mag tindog sa jusgado.

Para mientras, habo ngona nindang magpaluwas nin dugang na mga pahahagad dapig sa bagay na ini.

Nag promisa an pulis na dai sinda maontok sagkod na dai makua an naggibo kan krimen ki Rapinan.
Share:

Featured Post

San Miguel Bay Writers Workshop now open to applicants

The Central Bicol State University of Agriculture- Calabanga College of Education in cooperation with The Writers Project and Parasu...