Saturday, June 9, 2018

Marano Gang leader nabadil kan pulis


LEGAZPI CITY –An lider kan Marano Gang na iyo si Noli Marano asin sarong miembro kan grupong ini an nagadan kan makibadilan sa mga pulis kan Libon, Albay, kan sarong aldaw.

Si Marano dating miembro kan Concepcion Group, na nagtiwalag sa sinambit na grupo, sabi kan pulis.

Arog kan Concepcion Group, an bagong tugdason na Marano Gang, sinasahotan na imbuelto sa dakul na krimen sa primer distrito kan Albay asin sa ibang banwaan kan Camarines Sur.

Sa report ni Chief Insp. Diome Cardano, an hefe kan pulis sa Libon, naka-enkwento ninda si Marano asin Elan Mark Domdom, sa Brgy. Sagrada, Libon, Albay, kan fecha 6 kan Hunyo, poco mas o menos alas 6:00 nin aga.

Ipinahayag pa kan hefe kan pulis na maserve kuta sinda nin mandamiento de arresto sa mga suspechado kan biglang paoranan sinda nin bala, kaya sinda nagbalos nin putok.

Binawian tulos nin buhay si Marano asin Domdom.

Sabi pa sa report, sarong residente kan barangay an nag-sumbong sa pulis kan presencia kan mga miembros kan gang.

Mientrastanto, idinagdag sa report kan mga imbestigador na an paboritong biktimahon kan Marano Gang iyo an mga collector kan mga nagpapautang nin cuarta na mga companiya, o lending companies.

Sinambit kan pulis na prueba iyo an motorsiklo na gamit kan collector nin hinoldup sa Brgy. Barayong, Ligao City kan Mayo 26, 2018 na nakua sa mga suspechado.

Nabotbot sa bulsa kan mga nagadan an documento kan motor, arog kan deed of sale, licencia kan hinoldap na collector kan ARDCI sa Polangui, Albay.

Nagsahot an pulis na afuera kan pagholdup asin regular na paghagad nin cuarta sa mga kagsadire nin mga tindahan sa Libon, Albay, igwa man sindang operasyon sa ibang banwaan sa luwas kan Albay.

An mga pulis naghagad nin dagdag na fuerza na dapat idistino sa lugar nin huli kan pig lalaoman na pag resbak kan grupo.

Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...