Saturday, June 16, 2018

Albay, CSur shabu supplier, dakop na


DARAGA, Albay (Bicol Standard) -- Tibaad maghuraw na an dating mahibugon na supply nin shabu sa Albay asin Camarines Sur nin huli sa pagkadakop kan tulong mayor na suspechado sa pagbariwas kan bawal na bulong.

Ini an observasyon kan mga ahentes kan PDEA pakatapos kan operasyon na nagresulta sa pagka-arestar ki Jan Mark Balguma Rapisura Alyas Matik, Jomel Orpiada Dela Cruz asin Jose Bartolata Tabuena, Jr. Alyas Third . Sinda an konsideradong High Value Targets sa anti-drug operation.

Sinabi sa report ni Dir. Christian O. Frivaldo kan PDEA Bicol na an mga suspechado yaon sa Neuhaus Inn sa Maroroy, Daraga, Albay kasubagong mag-omagahon kan mag-abot an mga autoridad.

Afuera sa 3ng High Value Targets, tolong iba pa an kaayon sa na-aprehendir. Ini iyo sinda: Marlon Fernandez Llenas alias “Bok Fernandez,” Lorraine Santiago Casilum, 28, asin Elmeph Conciado Calimutan, 37.

An nakumpiskar na shabu may gabat na 300 gramos, asin pwedeng ipabakal sa kantidad na P1.25 milyones.

Sa separadong entrevista ki Mayor Noel Rosal kan Legazpi City, saiyang sinabi na pwedeng an grupong ini an nagdidistribuir nin shabu sa mga provincia kan Albay asin Camarines Sur, segun sa saiyang informante.

An ibang residentes digdi nagsabi na an awtong nadakop na lunadan kan mga suspechado na may retrato ni Presidente Rodrigo Duterte pirmi nindang naheheling.

Nakabugtak sa retrato sa awto an tataramon na “Change is coming.”

Pasipara sana kan mga tawo na tawanan atensyon an nagbabaray-basay na vehiculo sa paghona na makusog na suportador o konektado sa opisina kan Presidente an lunad digdi.

Share:

Featured Post

Bicol employers reminded to give 13th month pay on time

LEGAZPI CITY - The Department of Labor and Employment (DOLE) RO V reminded employers to pay the 13th month pay of their workers on time a...