Tuesday, May 22, 2018

Iwal kan nadaog na Kapitan asin Vice Mayor sa Albay huli sa droga, urog na naglala


ni Vince Villar

Guinobatan, Albay – Urog na naglala ang dingkilan kan nadaog sa pagka Punong Baranggay asin incumbent Vice Mayor sa banwaang ini huli sa isyu kan iligal na droga na nag ugat sa pagpapaluwas kan narco list kan PDEA.

Ini matapos na magpa blotter sa Guinobatan Municipal Police Station si dating Kapitan Roland Mijares kan Brgy. Bubulusan kung saen pig aakusaran kaining si Vice Mayor July Tingzon an nasa likod kan mga huma sa buhay na naririsibi niya sa ngonyan.

Segun sa sumbong ni MIjares, duwang banggi na suboot na narereparo niya an riding-in-tandem na pabalik balik sa luwas kan saindang residensiya.

Nagtutubod si Mijares na si Tingzon an nasa likod kaini huli sa expose niya na imbwelto man an bise alkalde sa iligal na droga.

Andam suboot siya na patotoohan ini sa paagi kan pagluluwas na maninigong ebidensiya.

Sa suhay na intrivista kay Vice Mayor Tingzon, tinawan doon kaini na wara siyang kakayahan na magpagadan nin tawo o manakot gamit an riding-in-tandem huli ta siya ngani mismo an pirming solo sana naglalakaw asin warang bodyguard.

Ipiglinaw ni Tingzon na an pagkauyam saiya ni Mijares an haluyon na puon pa kan siya Municipal Councilor pa sana man kan taong 2005.

Segun kay Tingzon, pina imbestigaran niya suboot an Bubulusan kan panahon na ito huli sa rampanteng illegal logging.

Taong 2014, pigkwestyon man si Mijares kan Commission on Audit kun napasain suboot an mga bagas na dapat kuta relief sa mga naapektaran niyang residente.

Taong 2016 kan pigraid kan mga kapulisan an residensiya kan nasabing Kapitan huli kan isyu sa droga.

Sinahutan suboot ni Mijares si TIngzon na iyo an nagpasugo na i-raid ini.

An pinaka latest suboot na nadagit si Mijares kay Tingzon, iyo an sinabi niyang 95% kan mga nasa listahan kan PDEA na taga Guinobatan (10 Kapitan, 12 Kagawad) an totoo.

Tinawan doon ni TIngzon na an pinagbasehan niya suboot iyo an bilang kan mga naaraman niyang nagsurrender sa Oplan Tokhang kan PNP.

Digdi suboot nadagit nin maray si Mijares, urog na kan nadaog ini sa pagka Kapitan, kun kaya nagpuon ng akusaran kaini an Bise Alkalde na imbwelto sa droga.

Sa Presente, tulo ng Drug Test Result hali sa Regioanl Crime Laboratory, PDEA, asin DOH an ipinaluwas ni Tingzon sa publiko, kung saen ipinapahiling na negative siya sa droga, ngani patunayan na mali an akusasyon saiya ni Mijares na naggagamit siya nin droga.

Nagtutubod si Tingzon na pulitika an dahilan kan isyung ini huli ta an nasa likod suboot ni MIjares iyo an opisyal man sa munisipyo na muya siyang rauton huli ta may plano siyang kalabanon sa 2019 Local Election.

Dae na nginranan kan Bise Alkalde kun sisay na opisyal ini, alagad sinabing nasa Narco List man ini kan PDEA.

Miyentrastanto, kinumpirma ni Tingzon na sa 34 na mga nagkandidatong sa Brgy Election na nasa Narco list kan PDEA asin PNP, 14 digdi an nanggana, 22 an nadaog.

Sa 10 Kapitan na nginaranan kan PDEA, 7 an nanggana, 3 an nadaog, kabale na suboot si Mijares.
Habang sinusurat an baretang ini, wara pa nin komento si Mijares sa mga pahayag na ini ni Vice Mayor Tingzon.
Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...