Tuesday, May 22, 2018

2 an gadan sa aksidente sa Libmanan



NAGA CITY 5/22/18 (BICOL STANDARD) (Updated) Dai na nakasalvar sa kagadanan an duwang tawo na biktima kan nangyaring karambola kan limang awto sa Brgy. Mabini, Limanan, Camarines Sur, kasubagong aga.

Sarong familya an nakalunad sa Avanza.

An aksidente nangyari sa tungod kan Brgy. Mabini, sa Maharlika Highway.

Segun sa pahayag ni P/Supt Errol Garchitorena Jr., an hefe kan Libmanan PNP, nag probar na mag overtake an Avanza sa pig susunodan na awto kan makasabatan an bus, na nagdadalagan hale sa sabat na direksyon.

Huli kaini, nagkabungoan an duwang awto, na iyo an naging rason para mawaran nin control kan manibela an driver kan van, dangan nakabanga pa sa sarong kotse.

May saro pang pampasaherong bus an nagtupa sa kotse, kaya nawaran na nin control an nakasunod na van, na nagbanga man sa mga awto.

Nin huli kaini, nagsapo nin mga lugad asin rungas sa lawas an 11ng tawo na lunad sa mga awto na tulos idinalagan sa hospital.

Nin huli sa grabeng kusog kan bangaan, binawian nin buhay an driver kan Avanza asin saro pang paratukdo (teacher).

An PNP Libmanan nag-iimbestigar pa kan kasong ini.
Share:

Featured Post

Faeldon Jr., dakop sa Naga City sa drug raid

NAGA CITY--Nagpahimutik si Nicanor Faeldon Jr., aki kan pamayo kan Bureau of Corrections (BUCOR) na si Nicanor Faeldon, na dai siya im...