Tuesday, May 22, 2018

12 irido sa karambola kan 5ng awto sa Libmanan



NAGA CITY 5/22/18 (BICOL STANDARD) Doce (12) katawo an irido na idinalagan sa hospital sa Libmanan sa nangyaring karambola kan limang awto sa Maharlika Highway, sa Brgy. Mabini, Libmanan, Camarines Sur kasubagong aga.

Base sa enot na imbestigasyon an driver kan kotse na nagprobar na mag-overtake sa pig susunodan na awto an naging mitsa kan dakulang aksidente.

An sabi, dai kinaya kan driver kan kotse na mabawi tulos an manibela tangani na maka-ibitar na makabongoan an kasabatan na bus. Nin huli sa kusog kan bangaan, nawaran nin control kan manibela an driver.

Apisar kan nakisuagan an kotse sa bus, nakadalagan pa ini sa guilid asin abaga kan tinampo, asin buminudal sa poste.

Siring man, saro pang pampasaherong bus an nasabitan kan nagwawariwad na kotse, asin an kasunod nindang van suminalpok pa sa nasambit na mga lunadan.

Nin huli kan karambola nin mga awto, nagsapo nin mga gatok asin rungas sa saindang lawas an 12ng pasahero, na dinara man tulos sa hospital sa Libmanan.

Pirang minutos an naka-agi, an mga paciente an idinalagan sa hospital sa Naga City.

Marikas man si pag responde kan Disaster Risk and Reduction and Management office kan Libmanan, kaya sa paagui ni Noel Hara, an Operation Commander kan opisina, napadara tulos nin emergency team sa lugar na pinangyarihan kan aksidente.

Mientrastanto, an saro sa mga biktima iyo an sarong omboy na naka-apon pa ngani sa tinampo nin huli sa kusog kan aksidende. Naheling kan mga nagsapod sa aki na si saiyang lalawgon igwa nin mga saradit asin kapidasong salming, na hale sa mga nadisgraciang vehiculo.

Mantang sinusurat an baretang ini, an nagkapira sa mga nakalunad sa mga nadisgraciang awto an binubulong sa hospital.

An aksidente iyo an nagdara nin grabeng traffico sa lugar kaya inabot nin amay na odto antes na makalusot an byahe hale sa Manila palaog sa Naga asin an kasabatan na mga vehiculo na resulta kan nagubot na trapiko sa lugar kan aksidente.

An pulis nag iimbestigar pa kan sinambit na incidente hastang sinusurat an baretang ini.
Share:

Featured Post

Use money wisely, UltraLotto 6/58 winners told

Philippine Charity Sweepstakes Office (PCSO) General Manager Alexander Balutan has advised the two lucky winners of the P1.1 billion to u...