Saturday, May 12, 2018

1 Army gadan, 3ng CAFGU irido sa ambush sa Libmanan


LIBMANAN, CSur--Sarong miembro kan army asin tulong CAFGU an nalugadan sa ginibong ambush kan mga miembros kan NPA sa Libmanan, Camarines Sur kasuodmang hapon.

Sabi ni Col Paul Regencia, an para taram kan 9th ID kan Philippine Army, an ambush nangyari sa may boundary kan Barangay Malinao asin Pag Oring Nuevo, kasuodmang alas 4:45 nin hapon.

An mga soldados pig destino sa lugar paga magtabang sa pag mantinir kan katuningan sa gigibohon na election kan barangay asin SK sa Lunes, sa nasambit na lugar.

Sampulong mga NPA an naghipa sa mga soldados, asin nag gamit nin improvised explosive devise sa agihan kan mga army.

Nakipag badilan an mga army na nagdurar nin 15 minutos.

Sabi pa ni Regencia na pwedeng may tinamaan man na mga rebelde sa nasambit na baradilan.

An Barangay Pag-Oring Nuevo an saro sa 18ng barangays sa Libmanan, Camarines Sur na pig babanwayan ngonian kan mga awtoridad ta yaon ini sa Category 2, bilang election hot spot sa maabot na pirilian.

An lugar consideradong nasa Category 2 election hotspot kun igwa nin makusog na ralaban an mga kandidato, igwa nin estorya nin kariribokan sa panahon kan election, o may presencia kan mga armadong grupo asin may peligro sa buhay kan mga tawo.
Share:

Featured Post

ADNU Senior High teacher found dead

NAGA CITY (Bicol Standard) -- The lifeless body of Senior High School teacher was discovered hanging at the room she was renting at CE...