Wednesday, April 25, 2018

Recall election sa Caramoan, gadan na


NAGA CITY 4/24/18 (BICOL STANDARD) Biglang napara an paglaom na madagos an recall election sa banwaan kan Caramoan, Camarines Sur na imbuelto an pwesto ni Mayor Marilyn Cordial.

Sabi sa official na report ni Ronald Beltran, an Acting Election Officer kan Caramoan, natapos na sinda sa pag verificar kan mga firma asin thumb marks kan mga suboot naghohorot na ipa-recall si Cordial kan fecha 23 ngonian na bulan.

An resulta kan verificar, harayo na maray sa kinakaipo na valido na firma kan mga elector tangani na magkaigwa nin recall election.

Sabi ni Beltran ginibo an verificasyon kan fecha 11, 12, 13, 16 17 asin 18 ngonian na bulan.

Kuta na, an kaipohan na firma para madagos an recall election 6,399 gabos, nin huli ta ini an 20% kan gabos na rehistradong elector kan banwaan.

Sinabi pa sa report, enot kaini, na an petitioner para sa recall election na si Marilyn Hernandez-Co nag presentar nin 9,143 na mga firma kan mga elector.

Alagad, kan ginibo an saro-sarong verificasyon kan mga firma asin thumbmarks, 2,846 sana an valido o 8.9 porciento sana kan hinahagad kan ley.

An ibang mga firma, palsipicado, o bako man firma kan elector.

Mientrastanto, may natada pa kuta na 987 na mga firma na dai pa na verificar.

Pero, sabi ni Beltran, maski pa i-dagdag pa gabos ini, maabot sana sa 3,833 an total na firma, o 11.98%, na kulang na maray sa hinahagad na 20% para sa recall election.

Nin huli kaini, mayo nang paglaom na madagos pa an pig hohogop-hogopan na recall election sa banwaan kan Caramoan, Camarines Sur.
Share:

Featured Post

San Miguel Bay Writers Workshop now open to applicants

The Central Bicol State University of Agriculture- Calabanga College of Education in cooperation with The Writers Project and Parasu...