Friday, April 20, 2018

LTFRB Bicol Director Jun Abrazaldo, mababa na sa pwesto ngonyan na aldaw


ni Vince Villar

Legazpi City (Bicol Standard) – Nakatalaan na magbaba na sa saiyang pwesto ngonyan na aldaw, Abril 20, 2018, si Land Transportation Franchising and Regulatory Board o LTFRB Regional Director Jun Abrazaldo matapos pormal ng pasalidahan ini kan saindang hepe na si Marvin Delgra.

Katakod kaini, sarung simpleng seremonya an nakatalaan na gibuhon ngonyan na aldaw para sa turn over kan position kun saen piglalauman na aatindiran kan mismong LTFRB Chief.

Katukal ni Abrazaldo iyo si retired Colonel Vladimir Cahulugan.

Inihayag ni Abrazaldo na dai siyang magiginibo kung ini an kagustuhan kan saiyang mas halangkaw na opisyal, alagad, tinawang doon na kontra siya sa nangyaring pagsalida sa saiya huli ta dai ini uminagi sa tamang proseso asin saro sana soboot ining pangha-harass sa saiya.

Sa saiyang paghampang sa media, pinahiling pa kaini an saiyang mga akomplisyementos asin hinagyat pa si Delgra na sabay sindang magdimitir sa pwesto.

Nangapudan man ini ki Presidente Rodrigo Duterte na pa-imbestigaran an Chairman kan LTFRB sa soboot salang mga gawi gawi kaini.

Sinabi ni Abrazaldo na igwa siyang mga ebidensiya na magpapatunay na igwang mga kalokohan na pigigibo an sinambitan ng opisyal.

Mientrastanto, piglinaw ni Abrazaldo na dai siya tinanggal, sinuspinder o kinasuhan kundi sinalidahan sana siya bilang pamayo kan LTFRB Bicol.

Pangapudan kaini sa bagong masangling Regional Director na ipadagos an mga magagayon na programa asin proyekto kan LTFRB para sa kapakanan kan mga Bicolano.

Kun babalikan, tulong aldaw an nakalilihis kan marisibi ni Abrazaldo an surat hali sa LTFRB CHief na nagsusugo sa saiyang bakantehon na an posisyon. Dae pa man naghahaloy kan magpaluwas nin 90 days preventive suspension an DOTr sa hearing Officer kan LTFRB Bicol na si Atty. Mary Jil Carurel huli sa reklamong isinangat ni Abrazaldo.
Share:

Featured Post

Bicol employers reminded to give 13th month pay on time

LEGAZPI CITY - The Department of Labor and Employment (DOLE) RO V reminded employers to pay the 13th month pay of their workers on time a...