Monday, April 9, 2018

Duwang drug surrenderer, binadil gadan sa Albay


Ni Vince Villar

Daraga, Albay - Gadan an duwang drug surrenderer mantang lugadan man an saru pang nadamay kan sinda pagbabadilon kan riding-in-tandem kasubanggi sa Brgy. Inarado, Daraga, Albay.

Sa intrivista kay Police Supt. Elcid Roldan, Hepe kan Daraga Municipal Police Station, binisto kaini an mga nagadan na sinda Dare Ruanje Lorena y Monsalve, 19 anyos, soltero asin Christian Lomerio, mga residente kan nasabing barangay.

Si Lomerio, an dead-on-the-spot, mantang si Lorena an nagadan mantang pigbubulong sa ospital.

Nadamay man asin nalugadan si Sherwin Marbella y Magallon, 20 anyos, soltero, kan kaparehong barangay.

Segun kay Pol. Supt. Roldan, nasa recovering stage na ini ngonyan alagad padagos na pig oobserbaran.

Sa pag iimbestigar kan pulisya, bandang alas 7:45 kasubanggi, Abril 8, 2018, mantang nagbabarbecue an an mga biktima sa barbeque strand na pagmamaysadir ni Lorena, kan biglang puminundo an sarung itom na Suzuki Smash na warang plate number, buminaba an duwang naka full face helmet na mg asuspek, dangan pinagbabadil an mga biktima.

Tulos na nadara sa ospital an duwa sa mga biuktima apwera kay Lomerio na nagadan on the spot.

Piglinaw ni Roldan na sobra sarung oras na bago na-ireport sa sainda an insidente, kun kaya nahaluyan man an responde.

Sa record kan PNP, si Lomerio asin Lorena an duwa sa mga drug surrenderers ninda kan Pebrero 21, 2016.

Huli kaini, may relasyon sa droga an enot na nahihiling na anggulo kan krimen.

Binasol man ni Roldan an mga biktima huli ta haloy na palan nakakahiling an mg aini nin kaduda dudang mga persona sa saindang lugar, alagad dae man lamang nagreport o nagsumbong sa pulisya.

Padagos pa ngonyan na iniimbestigaran an pangyayari, ngani mabisto an mga nasa likod kan krimen.

Magigirumduman na kan 2016, na sa nasabing barangay, nagadan an Brgy Kapitan kaito na si Rommel Marticio, matapos na manlaban sa mga otoridad na nagsagibo nin buy bust operation kontra sa saiya.

Share:

Featured Post

DepEd to conduct National Child Protection Summit 2018

The Department of Education (DepEd), in partnership with the United Nations Children’s Fund (UNICEF) Philippines and Child Protection Net...