Monday, April 16, 2018

Buyong na construction worker sa Albay, nahulog sa higdaan, gadan


ni Vince Villar

Malinao, Albay - Gadan an sarung Construction worker matapos na mahulog sa pigtuturugan na double deck sa saindang apartment sa Malinao, Albay, dara naman kan matinding kabuyungan.

Sa impormasyon na ipinaabot kan Malinao Municipal Police Station, binisto an biktima na si Jose Diche Dioquino, 28 anyos, soltero, laborer sa pinapagibong dike sa Brgy. Bagumbayan, Malinao, reasidente kan Brgy. San Juan, Bacon, Sorsogon, alagad para miyentras na nagrerenta sa harong kan sarung nangngangarang tito Buban sa nasabing barangay.

Nadiskubre an bangkay kaini kan saiyang katrabaho bandang alas 5:45 nin aga kasuudma, Domingo, Abril.

Sinasabi sa pag iimbestigar na sobrang nabuyong an biktima dara kan irinuman ninda kan Sabadong banggi.

Sinasabing binantayan maray ini kan saiyang mga pag iriba, alagad, bandang alas 2:00 nin maaga, naglipat suboot ini sa itaas kan double deck na higdaan sa 2nd floor kan harong.

Dahil ta wara man nin ulang an double deck, nahulog ining enot an payo sa semento diretso sa hagdanan.

Nagtutubod an pulisya na wara man nin foulplay sa nangyari alagad dinara pa man liwat ini sa sarung funeral parlor sa Bacacay, Albay ngani maipa otopsiya.
Share:

Featured Post

Catandungan Festival 2018: Celebrating 73 years of Independence

The Catandungan Festival is celebrated every October to commemorate the foundation anniversary of Catanduanes as a province independent...