Tuesday, March 6, 2018

Sobra 54k na evacuees, papaurulion matapos ibaba sa Alert Level 3 an Mayon


ni Vincent T. Villar

Legazpi City – Nagpupuon na ngonyan an decampment kan 54, 657 na mga persona o 14, 520 na pamilya gikan sa manlaen laen na evacuation centers sa Albay matapos na ibaba na kan Philippine Institute of Volcanology and Seismology o PHIVOLCS an alerto kan bulkan sa level 3.

Segun ki Albay Public Safety and Emergency Management Office (APSEMO) Chief Dr. Cedric Daep, an mga pauulion iyo an mga nasa laog kan 8kms Extended Danger Zone mantang matatada pa an mga nasa 6kms Permanent Danger Zone (PDZ) asin 7 kms extended danger zone.

Nangangahulugan na maabot sa 2,666 na mga pamilya na sana o 10,836 na persona an matatada sa 13 mga mga evacuation centers sa sarung siyudad asin apat na munisipyo.

Sa Daraga, maabot sa 337 na pamilya o 1,552 na mga indibidwal, 278 na pamilya o 1,693 na persona sa Camalig; 569 pamilya o 2,214 na persona sa Tabaco City; 1,303 pamilya o 5,067 na persona sa Malilipot asin 79 na pamilya o 310 na persona sa Guinobatan.

Ipiglinaw ni Daep na makaka-risibe pa man giraray nin relief goods an mga idi-decamp na mga residentes antes sinda makabalik sa saidang mga kaharungan.

Ini an dahilan kun kaya may ibang lugar na sa mga masunod pang aldaw mapa uli nin evacuees huli ta madispuner pa an LGU nin pampabalon sa sainda.

An Legazpi City, na iyo an may pinakadakol na evacuees an sa maabot pang Huwebes mapa decamp segun kay Alkalde Noel Rosal.

Miyentrastanto, nagpatanid si Philvolcs resident volcanologist Ed Laguerta na bako pang salbado asin bako pang silensiyo an bulkan mayon maski pa ibinaba na kan ahensiya an alert level 3.

Segun ki Laguerta, maski na ngani dai sindang namomonitor na bagong lava intrusion sa laog kan bulkan asin kadaklan mga surficial event lang, posible pa ining bumalik sa dating alert level 4, kun mabago pa an bulkan.

Sa presente, wara sindang namomonitor na posibleng bumalik pa ini sa dating estado, alagad soboot, mas importante an salbasyon kung kaya dai nanggad mag-kampante.

Paliwag ni Laguerta, sa estimate kan Phivolcs, nasa 67 million cubic meters na an ibinugang ejecta kan mayon asin dai pa madeterminaran kun pira digdi an lava materials asin an loose materials na posibleng iwawa enkaso magpara kusog an pag-uuran.


Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...