Monday, March 12, 2018

Motor sa dagat nalubog, 1ng pasahero nawawara


LAGONOY, CSur - An saro sa 4 na nakasakay kan motorized banca na byahe pasiring sa Barangay Balaton, Garchitorena, Camarines Sur an pig hahanap pa ngonian kan malunod an sakayan sa delinquenteng lugar sa tungod kan Barangay Mapid, Lagonoy, Camarines Sur.

Sabin i SPO3 Alven Alvaran, kan Lagonoy PNP, nangyari an aksidente poco mas o menos alas 11:45 nin odto.

Ipinahayag kan mga informante na posibleng magabat an cargamento kan sakayan, kaya kan makasabat nin darakulang alon, dai ini naka agwantang malikayan an hukol.

An mga naka sakat sa de motor na baroto iyo an minasunod: Alex Mabag, 32 anyos, Arwin Mabag, 30 anyos, Ariel Abainza, 39 asin asin si Allan Baao, 30 anyos an edad.

Sa presente, pig hahanap pa si Baao, nakabutas sa sakayan na saindang pig lulunadan.

Pig iimbestigaran kan mga awtoridad kun ano an rason ta nalunod an baroto.

Afuera kan apat na personas na nakalunad sa motorized banca, cargado suboot ini nin mga gamit sa contruction (cabilla) na dadarahon sa Barangay Balaton.

Mantang sinusurat an baretang ini, inako kan mga awtoridad na nadifisilan na maray na mahanap an saro pang nawawarang tawo, nin huli kan darakula an makusog an alon sa nasambit na lugar.


Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...