Tuesday, March 27, 2018

CAFGU, binadil gadan sa Albay



Ni: Vince Villar

Polangui, Albay – Dead-on-the-spot an sarung Cafgu mantang daplis sana an tama kan kairiba kaini, matapos tadtadon nin bala kan riding-in-tandem kasubagong aga.

Sa intrivista kay Police Chief Inspector Edgar Azotea, Hepe kan Polangui Municipal Police Station, binisto an nagadan na si Arnilo Secretario y Reonisto, 40 anyos, may ka live-in, CAA member nan aka base sa 22 Infantry Batallion kan 9th Infantry Division, Philippine Army, residente kan Molosbolos, Libon, Albay, asin nagtatrabaho bilang safety officer sa sarung construction sa Nabua, Camarines Sur.

Tinamaan man sa saiyang hita an kaiba backride kaining si Junasis Bonit y Manzano, 22 anyos, soltero, nag iistar sa Brgy Gabon, Polangui, Albay alagad native kan GMA, Cavite City.

Nangyari an insidente bandang alas 6:15 nin aga ngonyan na Lunes, sa Brgy Centro Occidental, kan nasabing banwaan, mantang mantang sakay kan rouser na motorsiklo an duwa pasiring sa Nabua ngani maglaog nin trabaho.

Suboot bigla na sanang pig cut kan mga suspek an mga biktima saka na tinadtad nin bala si Secretario.

Sa enot na putok, tinamaan na sa hita si Bonit alagad nangalas siya na si Secretario lang nanggad talaga an pinuntirya kan mga parabadil.

Nakua sa pinangyarihan kan insidente an 11 basyo kan bala kan 9mm asin 7 basyo kan bala gikan sa cal .45.

Matapos an insidente, tulos na duminulag an mga suspek pasiring sa Libon, Albay.

Segun kay PCI Azotea, may nakua na sindang kompya kan CCTV footage, alagad kaipuhan pa ninda ipa enhance ngani na mabisto an dae man naka helmet na mga suspek.

Inisyalmente, nahihiling na motibo ni Azotea, iyo an pagiging dating miyembro kan biktima sa noturyusong Concepcion Gang kan Libon.

Suboot, harani an biktima kay Gilbert Concepcion, lider kan grupo, bago ini nagsuhay asin nagtrabaho na sana bilang safety officer.
Share:

Featured Post

Treasurer's Office kan Prieto Diaz, Sorsogon sinalakat; P755 k an cuartang nawara

SORSOGON - Sinalakat nin dai bistong tawo an Municipal Treasurer's Office (MTO) kan Prieto Diaz, Sorsogon, asin nahabon an kantidad...