Tuesday, March 20, 2018

Babaying may kinasuhan huli sa utang, binadil, gadan


ni Vince Villar

Tabaco City (Bicol Standard) – An kasong Estafa laban sa saiyang barkada an saro sa mga pighihiling na anggulo kan mga otoridad kun ngata binadil, gadan an sarung babaying negosyante sa laog mismo kan compound kan simbahan sa Tabaco City kan Domingo nin banggi, bandang alas 9:40, Marso 18, 2018.

Sa intrivista ki Police Supt. Jefferson Araojo, Hepe kan Tabaco City PNP, inisyalmente, iyo an nagluwas na anggulo matapos maaraman na kina agahan kuta nin Lunes, Marso 19, maatinder nin hearing an biktima na may kinaaraman sa nasambit na kaso.

May dakula kaya suboot na pina utang an biktima alagad dae na nagbabayad sa haloy nang panahon.

Binisto an biktima na si Joan Cereza y Calla, 34 anyos, may agom, negosyante, asin residente kan Poblacion, Malinao, Albay.

Segun ki Supt. Araojo, may sadiring hardware, trucking business asin restaurant an biktima.

Nangyari an insidente mantang mabisita kuta ini sa saindang paryentes sa Brgy San Juan, Tabaco City, kaiba an duwang aki asin duwa pang pamangkin asin pinsan.

Napag araman na kada Domingo, pirming nag uuli an biktima sa lugar kaya posibleng natudan na an pattern na ini kan mga suspek.

Naenot na an mga suspek sa lugar asin nag aabang na sa biktima, sabi pa kan pulis.

Mantang nakapundo an sasakyan, basang na pigtahawan kan mga ini an sasakyan saka na pigbadil an biktima sa manlaen laen na parte kan hawak.

Maray na sanang dae man dinamay an apat na kaakian na kaiba kan biktima, segun sa pulis.

Matapos an insidente, naglakaw lakaw sana an duwang suspek parayo sa lugar.

Nahiling kan sarung tanod sa lugar an mga suspek alagad saru sa mga ini an tinutukan siya kaya nagtago na sana sa laog kan outpost.

Segun man sa guwardiya kan LCC Mall, nahiling niya an mga suspek na suminakay nin sarung SUV saka nagdulag parayo sa lugar.

Dae man naplakahan an nasabing getaway vehicle.

Matapos an insidente, narecover sa pinangyarihan an 3 basyo nin cal .45, asin 7 basyo kan cal .22.

Sa presente, pig-rereview na kan pulisya an gabos na CCTV sa lugar ngani mapandukan an mga suspek.

An cellphone man kan biktima an itinao na muna sa Cyber Crime Unit kan PNP ngani isairarom sa digital forensic examination.
Share:

Featured Post

Treasurer's Office kan Prieto Diaz, Sorsogon sinalakat; P755 k an cuartang nawara

SORSOGON - Sinalakat nin dai bistong tawo an Municipal Treasurer's Office (MTO) kan Prieto Diaz, Sorsogon, asin nahabon an kantidad...