Saturday, February 10, 2018

STL pinondo na sa CSur



NAGA CITY (Bicol Standard) -- Igwa nin limang aldaw an Evenchance Gaming Corporation, an nagpapadalagan kan Small Town Lottery sa Camarines Sur, na maka file nin motion for reconsideration – pakatapos na cancelaron na an saindang authorization na iyo an mag operar kan STL, sa provincia.

Ini an ipinahayag ni PCSO General Manager Alexander Balutan sa report na ipinadara sa Bicol Standard.

Alagad nin huli sa maisog na pagdakop sa mga nagpapataya kan STL sa Camarines Sur, susog sa direktiba na firmado ni Gob. Migz Villafuerte, pondo ngonian an pagtao nin medical assistance sa mga naghahagad saindang tabang na mga indigents o tios na mga tawo, segun ki Balutan.

Sinabi ni Balutan na poon pa kan sarong aldaw, paralisado na an saindang operasyon nin huli ta dinakop asin naka detinir an duwa nindang organic personnel na distino sa Pili, Camarines Sur.

Idinagdag ni Balutan na an ginibong pag arestar sa saindang empleado consideradong arbitrary asin illegal.

An duwang PCSO personnel na dinakop asin nasa carcel iyo an nag pipirma kan mga documento para sa oro-aldaw na ipig tataong assistencia financial sa mga tios, sabi ni Balutan.

Mientrastanto, idinagdag pa sa news report hale sa oficina ni GM Balutan na pusog an saiyang pagtubod na nangyari an raid sa saindang opisina, pakatapos kan interview sa sarong local na estasyon nin radyo sa Naga City, (bako sa BBS FM) ki PCSO Director Sandra Cam.

An interview mapadapit sa termination kan authority kan Evenchance Gaming Corporation na magpadalagan kan STL digdi.

An pag cancelar kan awtorisasyon sa Evenchance nin huli ta pigbalga kan STL kan Implementing Rules and Regulations.

Nagpapaherak pa ngani si Balutan kan sabihon kaini na an PCSO-Camarines Sur branch may oro-aldaw na allocation na kantidad P400,000, sa lindong kan flagship project na Individual Medical Assistance Program (IMAP).

Base pa sa saindang record, nag aabot sa 22 na cliente an saindang pig seservehan, oro aldaw, na kadaklan hale sa tios na familia, na natatawan nin tabang, kada aldaw sa paagui nin medical assistance.

Mientrastanto, sa parte ni Rep LRay Villafuerte, pig question suboot niya an operasyon kan Evenchance sa Camarines Sur, nin huli ta dai kaini na susunod an pag remit kan inaapod na presumptive monthly retail receipt, na ipig promisa kan Evenchance na itatao sa gobierno, na nakapalaman sa saindang application.
Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...