Saturday, February 3, 2018

Pangangaipo sa TLS, urog na nagdadakol – DepED


Ni: Vince Villar

LEGAZPI CITY – Urog pang naglolobo an bilang kan Temporary Learning Spaces o TLS na kakaipuhanon na ipatindog kan Department of Education (DepEd) huli ta nagdakol man an mga classrooms na ginagamit ngonyan kan mga evacuees dara kan padagos na pag alburuto kan bulkang Mayon sa Albay.



Photos by Christopher Flores
Sa Inrivista kay Ms. Mayflor Jumamil, tagapagtaram kan DepEd Bicol, base sa monitoring ninda, paghali sa  531 na kaipuhan na TLS, suminakat na ini ngonyan sa sobra 700.

Sa presente, sobra P13 million pa sana an inaprubahang budget kan saindang central office para sa 163 na TLS, hygiene kits asin cleaning kits.

Boot sabihon, sobra 500 na TLS pa an kaipuhan nindang maipatindog asin mahanapan ki pondo.

Segun kay Jumamil, nagpadara na suboot nin request sa Central Office si Regional Director Ramon Abcede ngani humagad nin dagdag na P40 million.

An TLS na nagkakantidad sobra P85,000 an kumpwesto kan mga light materials siring kan GI Sheets o yero, kahoy, oste, asin laminated na lanob.

 Depende na sana sa ibang school administrator kun ipapa semento pa ninda an flooring kaini.

Napag araman na sa ngonyan, nagtatiyaga na muna magkundukta nin emergency classes an mga estudyante asin maestra sa mga multi purpose hall, open spaces, mga nilumaang tent kan UNICEF, improvised na tent, asin mga makeshift rooms na pinagtarabangan na ipatindog kan mga magurang.

Apwera kan TLS, pigpoproblema pa kan DepEd an mga blackboards na gagamiton sa lambang klase.

Share:

Featured Post

Give the gift of creativity with Arog Kaito art fair in Daet!

DAET, Camarines Norte (Bicol Standard) -- Bicol Standard is a proud sponsor of a two-day art fair featuring the finest young creatives of...