Tuesday, February 6, 2018

P400K, natabag sa horoldapan sa Catanduanes


Caramoran, Catanduanes - Armado sana nin mga sundang, alagad kinakarkulong P400,000 an natabag kan tulong holdaper sa mga kolektor kan sarung lending company sa banwaang ini, alas 6:45 kasubanggi, Pebrero 5, 2018. 

Sa report na pinaluwas kan Caramoran MPS, binisto an mga biktima na sinda Ryan Romero y Tablizo, 28, Community Development Officer (CDO) kan ARDCI Microfinance, taga Brgy. Calatagan, Virac , Rodel Torres y Vargas, 28, CDO ARDCI, taga Brgy. Gogon Virac, asin Monser Briones y Arevalo, civilian escort, taga Brgy. San Andres, Pandan.

Nangyari an insidente sa Sitio San Jose, Brgy Mabini, kan nasabing banwaan.

Kahahali pa lang suboot sa pagkolektar sa saindang mga kliyente sa manlain lain na baranggay an mga biktima asin pauli na sa saindang opisina sakay kan duwang motorsiklo kan biglang  papunduhon sinda kan 
tulong mga naka maskarang kalalakihan gamit an kahoy na pigbalagbag sa tinampo asin armado nin mga sundang.

Kan dae na makapalag an mga biktima huli sa takot, pwersahan na kinua tulos an saindang mga backpack na naglalaman kan nasabing kantidad nin kwarta, duwang cellphones asin mga dokumento.

Pagkatapos makua an tuyo, tulos na duminulag sa dae maaraman na direksyon an mga suspek.

Huli ta harayo an distansiya kan Municipal police station, makalihis nin duwang oras na naipaabot kan mga biktima an sumbong sa pulisya.

Padagos pa an follow up investigation kan mga otoridad sa nasabing insidente.
Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...