Wednesday, February 7, 2018

Nakuang nakagapos na bangkay sa Pilar, Sorsogon, dae pa nabibisto


Ni Vince Villar

Pilar, Sorsogon - Padagos an pakikipagkoordinar kan Pilar Municipal Police Station sa gabos na mga pag iriba ninda saen man na parte kan Sorsogon o maging sa mga pagtaraid na probinsiya  ngani mabisto asin maklamar  an bangkay kan sarung lalaking nakuang nakagapos an mga kamot asin bitis, may tama nin bala sa payo asin daghan harani sa sementeryo kan Brgy Putiao, kan banwaang ini. 

Sa intrivista kay PO3 Alan Nunez, imbestigador kan kaso, nag iikot na suboot sinda asin naghahapot hapot manungod sa pagkakabistuhan kan biktima.

May nakapagreport na taga Brgy San Roque, Bacon District, Sorsogon City, alagad dae pa man ini nakumpirma kan opisyal.

Sinasabing nakasulog na berdeng bado, blue na short asin kalo, asin black violet na jacket an lalaki.

Nasa 5'2" an langkaw, slim an lawas,  20-25 an edad, warang tatoo sa lawas, asin malinig man sa lawas man ini.

Nahiling an bangkay kaini kan Lunes nin aga, Pebrero 5, kan sarung residente na naghatod nin estudyante.

Napag araman na madiklom an lugar asin bihira an tawo pag banggi.

May nakuang duwang basyo nin bala gikan sa Cal. 45 sa crime scene alagad sa pagtubod ni PO3 Nunez , diversionary sana ini kan mga suspek huli ta wara man nadangog na putok sa lugar.

Pwedesir na sa ibang lugar suboot ini ginadan asin tinapok na sana sa lugar.

Segun sa pulis, tinapukan naman nin bangkay an nasabing lugar kan nakalihis na taon.

Sa presente yaon nakapatinte sa sarung punerarya sa sentro kan Pilar an bangkay.

Naghahalat pa ngonyan an PNP kan resulta kan otopsiya.
Share:

Featured Post

NIA inaugurates P74-M pumping station in Camarines Sur

Ricefield in Bicol Bicol Standard file photo NAGA CITY (Bicol Standard) – No less than 1,728 farmers and their families in Camarines S...