Saturday, February 3, 2018

Decampment kan mga evacuees na yaon sa sobra 8 kms danger zone, ipigsugo na kan OCD Bicol


Ni: Vince Villar

Legazpi City - Pinauruli na ngonyan na Biyernes na pakapangudto kan Office of Civil Defense (OCD) Bicol an gabos na mga evacuees na nag iistar sa mga lugar na yaon lampas na sa 8 kms extended danger zone kan bulkang Mayon.

Segun kay OCD Regional Director Claudio Yucot, an mga pinauli na ninda iyo an mga residentes sa mga minasunod na Baranggay:

Bagong abre, Bigaa, Dita, Pawa sa Legazpi City.

Brgy. Alcala sa Daraga asin Datag sa Ligao City.

Brgy 1,2,3 asin 6 sa banwaan nin Camalig.

Segun kay Yucot, pagkatapos kan decampment liwat sindang mabilang ngani maaraman kun pira an nabawas sa 84,543 na evacuees.

Miyentrastanto, huli sa isyu kan dayaan sa lista kan mga evacuees, mapautob nin bago asin mas istriktong sistema an OCD.

Sinabi ni Yucot na igwa sindang mga binugtak na tawo sa kada evacuation centers ngani magbilang kada 3 oras.

Sisay man na dae kabale sa bilang an dae tatawan nin ayuda.

Tinawan doon kan opisyal na dae sinda masayang nin pondo sa mga bako man tunay na apektado.

Suboot dae pa aram kun madurar sagkod nuarin an pag alburuto kan bulkan kun kaya dapat na magpatipid asin magpasiguro nin pondo.

Napag araman na maging an mga nag iistar sa Manila o iba pang lugar na safe na sa Albay an nakalista pa sa mga evacuation centers.

Pag oras na nin pagtao nin relief, may nagpapaisi na sana sainda ngani klamaron ini.

Ini an dahilan kun kaya luminobo nin maray an bilang kan mga evacuees na segun sa obserbasyon, pinakadakula sa kasaysayan kan pagtuga kan Mayon.
Share:

Featured Post

Catandungan Festival 2018: Celebrating 73 years of Independence

The Catandungan Festival is celebrated every October to commemorate the foundation anniversary of Catanduanes as a province independent...