Wednesday, February 7, 2018

Dahil sa haranapan nin relief, tabang kan DSWD ididirekta na sa mga alkalde


ni Vince Villar

Legazpi City - Direkta nang itatao kan Department of Social Welfare and Developement (DSWD-Bicol) an saindang tabang sa mga Alkalde kan  3 siyudad asin 6 na munisipyo na apektado kan pagtuga kan Mayon sa Albay.

Resulta ini kan urulay kan mga Alkalde asin kan nasabing ahensiya ngani mapondo na an duda na wara man nahihiling na tabang gikan sa DSWD.

Nag ugat an isyu sa haranapan nin relief na nangyari kan nakaaging Mayon eruption briefing sa Camp General Simeon Ola kaiba si Sec. Francis Tolentino, an pigtalagang emisaryo ni Presidente Rodrigo Duterte ngani asikasuhon an problema sa mga evacuation centers.

Digdi, pigkwestiyon kan mga Alkalde an gari "missing in action" na sistema kan DSWD kun saen nagngangalas suboot sinda kun napasaen an sinasabing P32.8 million na tabang kan ahensiya mantang puro sa provincial government an nareresibe ninda.

Sa paliwanag kan Regional Director kan ahensiya na si Arnel Garcia, sinabi kaining
pigtatao ninda sa Provincial Social Welfare and Developement (PSWDO) an tabang asin iyo naman an bahala na magtaltag sa mga munisipyo an siyudad.

Tinawan doon kaini na sa ikatulong aldaw pa sana pakatapos kan nangyaring Phreatic Explosion kan Enero 13, 2018, nagtao na tulos sinda nin mga food and non food items sa PSWDO.

Nilinaw ni garcia, na augmentation o pandagdag sana man an saindang papel, alagad kun hahagadon an full support ninda, kayang suplayan an gabos na bakwit nin maski umabot nin 100 na aldaw pa.

Kun babalikan, naglataw sa mga bareta na enterong hali sa kanya kanyang IRA o Internal Revenue Allotment sana kan mga LGUs an pighahalian kan pondo ngani itabang sa mga bakwit.

Alagad, sa record na kapot ni Garcia, nagluluwas na sa sobra P168 million na nagastos sa haros sarung bulan na pag alburuto kan Mayon, P48.8 million digdi an hali a LGUs, P68.8 million sa National Government, P18.3 million sa mga NGOs, asin P38.2 million hale sa sainda sa DSWD.
Share:

Featured Post

Faeldon Jr., dakop sa Naga City sa drug raid

NAGA CITY--Nagpahimutik si Nicanor Faeldon Jr., aki kan pamayo kan Bureau of Corrections (BUCOR) na si Nicanor Faeldon, na dai siya im...