Saturday, February 3, 2018

Cash for Work kan DOLE para sa mga evacuees sa Albay, uminarangkada na


ni Vince Villar

Legazpi City - Nagpuon na an patrabaho kan Department of Labor and Employment (DOLE) Bicol sa 10, 000 na mga evacuees na nabenipisyuhan kan ipiglunsar nindang TUPAD o “Tulong Panghanapbuhay sa Ating Displaced workers” na sarung cash for work na programa para sa mga biktima kan pagtuga kan bulkang Mayon.

Sa impormasyon na pinaluwas ni Raymond Escalante, tagapagtaram kan ahensiya, an nasabing bilang an minakunpwesto kan enot na batch kan mga benipisyaryo kun saen nagpuon na sindang magtrabaho kan Enero 29 asin matatapos sa Pebrero 8 kan presenteng taon.

Pinili an mga ini gikan sa kada pamilya kan mga evacuees sa mga banwaan kan Guinobatan, Camalig, Sto dominggo asin siyudad nin Legazpi.

Makakarisibi an mga ini nin tig P290 na aldawan na sweldo o p2,900 sa laog kan 10 na aldaw.

Trabaho kan mga ini iyo an pagmantini nin kalinigan sa laog kan saindang evacuation centers.

Segun pa kay Escalante, mismong an saindang pamayo na si Secretary Silvestre Bello III an matao nin sweldo sa mga ini sa pagbisita kan opisyal ngonyan na bulan. 

An TUPAD o cash for work program kan dole an pinondohan nin P30 million asin pinapamahalaan kan DOLE Bicol Rapid Employment Assistance for Mayon o (DREAM) Team.

Segun kay Regional director Exequiel r. Sarcauga, obheto kan programa iyo an matawan nin kwarta an mga benipisyaryo ngani makabakal nin mg apangangaipo ninda, masiguro an kalinigan sa saindang mga evacuation centers, mapangataman an mga classrooms na pig ukupar ngani may magamit pa liwat an mga eskwela, maturuan na maging malinig sa palibot ngani maiwasan an mga helang, asin malikayan man an krimen, siring kan panghahabon, dulot kan kawaran nin kwarta kan mga ini.
Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...