Friday, February 16, 2018

Aki kan dating Chief of Police, pinagbabadil gadan sa Masbate


ni Vince Villar

Milagros, Masbate - Siyam na tama nin bala gikan sa dae madeterminaran na kalibre nin badil an tuminapos sa buhay kan sarung 27 anyos na soltero, na aki nin dating Chief of police, sa banwaang ini kasubanggi.

Sa report na naka abot sa Police Regional Office 5, Camp General Simeon Ola, Legazpi City, binisto an biktima na si Franklin Danao y Acaba, sarung Seaman, aki ni retired PSI Roberto Danao kan Milagros MPS.

Segun sa impormasyon, bandang alas 6:30 nin banggi, Pebrero 15, 2018, mantang nagmamaneho ini nin motorsiklo hali sa pagsaod, kan sabayan kan duwang suspek na naka motorsiklo man saka pinagbabadil sagkod magadan.

Sa ngonyan, duwang anggulo an tinututukan kan mga otoridad na pwedeng iyo an motibo kan krimen.

Enot an suboot istorya na may nakaiwal an biktima huli ta may sinaway ining karerebukan kan naka aging aldaw mantang an ikaduwa iyo an posibleng may kinaaraman sa dating trabaho kan ama kaini na kung saen dakol naging kadagit huli sa pagiging istrikto sa pag implementar nin mga ley.

Napag araman na pasakay na naman kuta sa barko an biktima asin nakaplanong magpakasal na sa saiyang ilusyon pakatapos.
Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...