Saturday, February 3, 2018

200 na mga portalets, ipapadara kan DOTR sa Albay


Ni: Vince Villar

Legazpi City – 200 na mga portable toilets o portalets an nakatalaan na ipadara ngonyan na semana sa probinsiya nin Albay ngani na magamit kan sobra 84,000 na mga evacuees dara kan pagtuga kan bulkang Mayon.

Segun kay Atty Francis Tolentino, an pigdesignar ni Presidente Duterte na Crisis Management Coordinator sa Albay, sinabi kaini na base sa pakikipag ulay niya kay DOTr Sec. Arthur Tugade, enot na ipapadara an 100 na units mantang isusunod sa mga masunod na aldaw an 100 na iba pa.

Sisimbagon na gabos kan DOTr an gastos sa transportasyon kan mga ini maging an cost of maintenance.

Napag araman na sa kada unit kan portalet, magastos digdi nin P2,000 kada aldaw parasa operation.

Boot sabihon, sa 200 na portalets, magastos an gobyerno nin P400,000 kada aldaw.

Kun babalikan, enot ng sinabi ni Albay Public Safety and Emergency Management Office (APSEMO) Chief Dr. Cedric Daep, na bako praktikal an paggamit kan portalets huli ta apwera kan magastos ini, dae man tuod an mga evacuees.

Pigsusuhestyon kan opisyal na diit na magpagibo nin mga kubeta na pangharaluyan ngani magamit pa sa mga masunod na kalamida o kan mga eskwela kan ginamit na evacuation centers.

Sa kabilugan, 1,222 na mga kubeta an dapat na maipatindog ngani na masunod an ideal ratio na 1:50.
Share:

Featured Post

Catandungan Festival 2018: Celebrating 73 years of Independence

The Catandungan Festival is celebrated every October to commemorate the foundation anniversary of Catanduanes as a province independent...