Tuesday, January 9, 2018

Tomboy na supplier nin shabu sa Sorsogon, arestado sa buy bust sa Legazpi City


LEGAZPI CITY - Arestado sa sarung buy bust operation kan pinagsarung elementos kan PDEA-Bicol asin PNP Sorsogon an babaying taga Legazpi City, Albay na pigtutubudan na iyo an nagsusuplay nin droga sa Sorsogon City, Sorsogon.

Sa entrevista kay PDEA Regional Director Christian Frivaldo, na iyo an nag supervise kan Operasyon, sinabi kaini na naghagad nin tabang an PNP kan Sorsogon City ta napag aramang sarung pusher hali sa Albay an nagbabariwas nin droga sa saindang lugar.

Sa paagi kan tarabangan kan PDEA ROV, Team Albay, sa pangenot ni Agent Enrique Lucero, PNP RID5, Sorsogon City asin Legazpi City Police Station, ikinasa kasubangging alas 8:30 an buybust operation sa Brgy. Puro, Legazpi City na nagresulta sa pagkaka arestar kay Emily Bolawan y Quiano, alyas "Tomboy," residente kan P2 Brgy Sabang Legazpi City.

Kaiba kaini sa naarestar si Chimbers Andes y Abejoro, residente kan Brgy. Ezperanza, Pilar Sorsogon.

Nakua sa mga suspek an 10 gramo nin suspected shabu na may pigkakarkulong street value na P65,000.

Napag araman gikan kay Director Frivaldo, na bago pa sana sa pagpabakal nin droga si alyas tomboy asin wara pa ini sa watchlist kan PDEA.

Mientrastanto, naogma si Frivaldo sa kaenot enoting coordinated operation na ini kan PDEA asin PNP sa Bicol huli ta nahiling na mas kuminusog pa an pwersa ninda.

Magigirumduman na nagka duwang beses na hinali alagad binalik ni Presidente Rodrigo Duterte sa PNP an anti drug war alagad an pinakahuri, dae na pipahiro an mga ini sagod na daeng koordinasyon sa PDEA. (Vince Villar)

Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...