Wednesday, January 24, 2018

Swiss national, nagpirit makarani sa lava front, inarestar


ni Vince Villar

Sto. Domingo, Albay -Napugulan na makalaog sa delikadong porsyon kan bulkang Mayon an sarung Swiss National asin kaiba kaining Pinoy na tourguide  matapos maarestar kan pulisya sa Brgy. Lidong, Sto. Dominggo, Albay.

Nangyari ini, alas 10:00 nin Martes na aga, Enero 23, 2018.

Sa istorya ni PCI Arthur Gomez, tagapagtaram kan Albay PNP, presenteng nagkukundusir nin pagpatrolya an mga kapulisan sa mismong porsyon kan 6 kms permanent danger zone kan bulkan kan igwang mag-osep na concern citizen manungod sa nagpipirit maglaog na dayuhan.

Sa pagtatabangan kan SWAT Team kan Legazpi City asin mga personahe kan Sto Domingo PNP , tulos na naarestar an duwa na nagbalo pa suboot kutang magpatago.

Binisto an dayuhan na si Christian Ryme, 51 anyos, taga Switzerland mantang an Pinoy tourguide iyo si Randy Longasa, taga Brgy. Padang, Legazpi City.

Napag araman na gustong mahiling kan dayuhan nin mas haranihan an lava flow kaya nagpirit makarani sa puro kan lava flow.

Dae naman nahaloy sa kustudiya kan pulisya an duwa dahil ta matapos pasabutan na bawal an paglaog sa lugar huli kan pagtuga kan Mayon, tulos na pina uli na an mga ini.

Miyentrastanto, dae kuntentado si Mayor Herbie Aguas na basang sana pinalibre an duwa na wara lamang sanction.

Segun digdi, lokal na gobyerno an mababasol kun may nangyari sa mga ini kun kaya dapat na maturuan leksyon ngani dae pangarugan kan iba.

Dae naabutan kan Alkalde an duwa huli ta nag atinder nin  Press briefing sa PDRRMC office sa Legazpi City.

Alagad ngonyan pinapahanap na niya liwat an mga ini.

An Brgy Lidong, an saru sa mga apektadong baranggay kan Sto Dominggo na ngonyan naka relokar na sa evacuation center.
Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...