Wednesday, January 31, 2018

Suspension of classes, dae na dapat kun dahil sana sa ashfall - APSEMO Chief

Camalig, Albay
Photo: Albay PIO

ni Vince Villar

Legazpi City - Ipigsusuhestiyon ni Dr. Cedric Daep kan Albay Public Safety and Emergency Management Office (APSEMO) na dae na pagsuspendiron kan mga Alkalde an klase kun dahil sana man sa Ash Fall.

Segun sa saiya, diit na minutos man sana an pigdudurar kan abo sa hangin kun kaya mas maray na yaon lang sa laog kan klase an mga aki asin magsulog na sana nin facemask o kaya magtakop nin dumog na tela.

Mas peligroso pa ngani suboot kun maruluwas an mga aki.

Saru pa, dae man pwedeng pabayaan kan mga maestra an mga eskwela niya.

Tinawan doon ni Daep na kung an magiging dahilan kan suspension iyo an pagiging delikado kan mga abo, dapat lugod isabay naman an enterong populasyon na apektado asin ilipat sa mga dae naaabot kaini.

Nilinaw kan opisyal na sa irarom kan Alert Level 4, salbado na sa anuman na klase nin peligro an sisay man na yaon lampas sa 8kms extended danger zone.

Dae suboot dapat mahandal sa nadadangog buda sa nahihiling sa bulkan kung yaon na sa safe zone.

Nilinaw kaini na an lava flow, rockfalls, asin pyroclastic flow o uson an dae naman nakaka abot nin lampas sa 6kms permanent danger zone.

Delikado sana kun mag uran nin gulpi asin bumaba an mga natipon na deposits sa paagi kan lahar flow huli ta harayo an maabutan kaini na mga salog sa ibaba kan mga apektadong gullies.

Kun siring kaini an mangyari, enot naman suboot sindang mapaluwas nin patanid sa mga lugar na posibleng agihan dahil ta may hazard maps naman sindang pigbabasehan.
Share:

Featured Post

Catandungan Festival 2018: Celebrating 73 years of Independence

The Catandungan Festival is celebrated every October to commemorate the foundation anniversary of Catanduanes as a province independent...