Friday, January 19, 2018

Sobra 3,000 na mga hayop, pigdudulag naman kay Mayon sa Albay


Legazpi City - Sobra 3,000 na mga baka, karabaw, kambing, asin karnero an sarabay ng binababa kan mga maysadiri kan mga ini hali sa pamitisan kan bulkan pasiring sa salbadong lugar na pig disignar kan Provincial asin Local Agricultures Office.

Sa intrivista kan Bicol standard kay Dr. Florencio Adunay, Provincial Veterinary Officer kan Albay, peligroso na sa mga nasambit na mga hayop an padagos na pagbuga nin abo kan bulkan kun kaya dapat na mailipat na an mga ini sa lugar na dae muna makakasabsab nin awot na kontaminado kan abo.

Sa banwaan kan Daraga, 480 na mga hayop an ibababa, 950 sa Camalig, mantang 1,500 sa Guinobatan.

Gabos ini an pinapalakaw na sana pababa kan mga maysadiri, alagad sa Ligao City, na igwang 200 man na hayop, kukuahon an mga hali sa duwang brgy na apektado asin isasakay sa mga trucks pababa sa Brgy Nasisi.

Nilinaw ni Dr. Adunay na sulamente an mga hayop sana na nagsasabsab nin awot an idudulag ninda sa abo huli ta iyo lang an pwede o madaling madanyaran.

Segun sa beterenaryo, an sulfur na yaon sa abo kan bulkan an delikadong makakan kan mga hayop na ini huli ta minaresulta ini nin blood poisoning na pwedeng ikagadan tulos.

Magin an pagparong kan abo an pwedesir na magresulta man nin toxic pneumonia.

Pigsiyerto ni Adunay na wara man nin magiging problema an mga paraoma sa ataman ninda huli ta nagpadara na an Regional Office kan Department of Agriculture nin mga concentrated feeds, inuman nin tubig, lubid asin temporayamenteng masisilungan kan mga baka.

Kasabay kaini an nagkapirang doktor asin technicians hali sa DA mismo asin mga volunteer NGOs ngani mag asikaso kan salud kan mga hayop.

Kun dae pa naililipat sa pigdisignar na lugar an mga hayop, may aviso si Doc Adunay na hugasan muna nin tubig an mga sinakateng awot antes ining ipakakan.

Sa presente, wara pa man na nairereport na casualty nin hayop an Provincial Veterinary Office na causa kan mga ash explosions puon kan naka agi pang mga aldaw. (Vince Villar)
Share:

Featured Post

Give the gift of creativity with Arog Kaito art fair in Daet!

DAET, Camarines Norte (Bicol Standard) -- Bicol Standard is a proud sponsor of a two-day art fair featuring the finest young creatives of...