Tuesday, January 30, 2018

Problema kan mga evacuees sa Albay, 1 week na tapuson - Pres. Duterte

Photo via Mayor Herbie Aguas

ni Vince Villar

Legazpi City - Nagpromisa si Presidente Rodrigo Duterte na tatapuson an problema kan mga evacuees sa Albay sa laog nin sarung semana sana.

Sa ginibong pagbisita kaini kasuudma sa Probinsiya para sa Mayon Eruption briefing, pigdisignar na kaini an dugong Albayano na si Atty Francis Tolentino ngani iyo an mamahala kan gabos na problema sa mga evacuation Centers.

Inisyalmente nagtao nin checke na nagkakantidad P20 million si Duterte kay Gob Al Francis Bichara na sinundan pa kan P5 million hali sa Philippine Charity Sweepstakes Office sa paagi ni Board Director Sandra Cam.

Nakulangan si Duterte sa tinao ni Cam kaya naghurot pa ini nin dagdag na P25 million sa Albay.

Sa kabilugan, P50 million ang tabang kan Malakanyag asin PCSO sa Albay, alagad segun sa Presidente, may masunod pa suboot na P50 million.

Muya man na masulusyunan tulos ni Duterte an problema sa toilets.

Sa presente kaya mangangaipo nin dagdag na 1,222 na toilets an labi 83,000 na mga evacuees ngani masunod an ideal ratio na 1:50.

Napag araman na 1:200 haros an ratio kan paggamit ngonyan kan toilet sa mga evacuation centers.

Dahil kaini kun kaya pigsugo ni Duterte an Department of National Defense o DND asin Armed Forces of the Philippines o AFP ngani maghanap nin mga portalets asin darahon tulos sa Albay.

Ta ngani man na matabangan an mga Paraoma na nadistroso an mga pananom, naglaan man an Department of Agriculture o DA nin 5 million emergency loan.

Sa kada sarung paraoma, pwede makautang nin P5,000 para sa pagnggastos sa pagbuhay asin P5,000 sa pagbakal mga banhi.

Kun babalikan, naireport kan Provincial Agricultures Office na sobra P100 million na an lugi sa agrikultura dara kan padagos na pagtuga kan Mayon.
Share:

Featured Post

Catandungan Festival 2018: Celebrating 73 years of Independence

The Catandungan Festival is celebrated every October to commemorate the foundation anniversary of Catanduanes as a province independent...