Tuesday, January 16, 2018

Pagtaas sa Alert level 4, wara pang indikasyon sa ibong kan sunod sunod na lava fountains, pyroclastic flows

Retrato: Vince Villar

Legazpi City - Nilinaw tulos kan Philippine Institute of Volcanology and Seismology o Phivolcs na an nahiling na ash cloud sa southwest na porsyon kan Mayon an dahil sa nag collapse o narumpag na lava.

Sa intrivista kay Director Renato Solidum, 10 beses suboot na nag collapse an lava kan Mayon puon kasubagong alas 6:00 nin aga kun kaya nagdulot ini nin Pyroclastic density current o Mahibugon na Ash cloud.

Causa kaini, apektado na naman liwat an mga residentes sa Camalig asin Guinobatan asin pagtaraid pang lugar.

Nanutaran na sa sentro kan Camalig an biyo pating nagdiriklom huli sa hibog kan abo na suminabay sa paros.

Alagad kun susumahon, sa latest bulletin kan Philvolcs, 75 na beses nagkaigwa nin lava collapse, 9 tremors, asin 4 lava fountains an Mayon sa nakalihis na 24 oras.

Kasubanggi, daeng patos an nagbulos kan nagbabagang lava na may kasabay na mga higanteng gapo an bulkang Mayon.

Segun kay Solidum, 4 na beses na nagkaigwa nin lava fountain asin huli sa sobrang labnaw kan lava, makaskas na nakababa ini sagkod 2 kilometros na distansiya kan Miisi Channel kan banwaan nin Daraga.

Apwera digdi, abuton man sa sobra sarung kilometro an ibinaba kan lava pasiring sa Bonga gully kan Legazpi City.

Miyentrastanto, dae pa masukol kan philvolcs an amount kan Sulfur Dioxide emmission o SO2 huli ta dae pa sinda nakakapag aerial survey dara kan raot nin panahon.

Segun kay Solidum, babaluon ngonyan na aldaw kan saindang assesment team na magpalayog nin drone alagad kun dae, an mga available na instrumento na muna sa baba kan bulkan an gagamiton.

Nagtutubod an opisyal na halangkaw an content kan sulfur kan bulkan huli ta nagkokolor bughaw an nagbubugang aso sa puro kaini.

Sa ibong kan mga nanutarang aktibidad kan bulkan ngonyan na aldaw, nilinaw ni Solidum na wara pa man sindang nahihiling na indikasyon na dapat na ining itaas sa Alert Level 4.

Para ilangkaw an alerto kaipuhan na makapagrecord nin halangkawon na sulfur dioxide content an Mayon asin makapagrehistro nin dire diretsong pagtanyog kan daga. (Vince Villar)

Share:

Featured Post

14ng pasahero sa jeep na nahulog sa Tinambac, salbado na

TINAMBAC, CSur - Binasol ni Municipal Councilor Jonas Soltes an Department of Public Works and Highways (DPWH) sa saindang kapabayaan n...