Monday, January 15, 2018

Pagtaas sa Alert level 4 kan Mayon, imposible pa – Phivolcs Albay


Legazpi City - Imposible pa na maglangkaw sagkod level 4 an alerto kan bulkang Mayon huli ta dae pa man ini nakapagrehistro nin darakulang aktibidad.

Segun kay Resident Volcanologist Ed Laguerta, kun pagbabasehan an seismic record ninda sagkod ngonyan na aga, malabog pang itaas an alerto.

Kasubanggi, itinaas sa Alert Level 3 an Mayon huli sa 3 magkakasunod na phreatic eruptions na nagpuon nin Sabadong hapon.

Puon kasuudmang udto sagkod ngonyan na aga, Enero 15, 2018, wara na nin nangyaring pagbuga nin abo alagad nakapagrehistro nin 141 rockfalls  asin 2 low frequency na fluid related events.

Nahiling man puon kasubanggi an maliwanagon na banaag kan crater na buminulos sa South west na porsyon alagad dae ma asses na maray huli sa hibog kan panganuron.

Alagad kinumpirma ni Laguerta na lava an nahiling na nagluuwas sa bunganga asin luway luway na minaluwas huli sa mga naka ulang na darakulaon na gapo paibaba kan bulkan.

Kasubagong alas 9:41, nagkaigwa nin pagbugawas nin abo pero ini an saru palan na Ash Clouds o nagitaas na abo sa ere dara kan biglang bulos kan makusog na uran.

Hagad ni Laguerta na gumayon na an panahon ngonyan ngani mas pang mapakaray an monitoring ninda.

Sagkod kaya na mauran, dae masusukol an sulfur dioxide kan bulkan. (Vince Villar)
Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...