Wednesday, January 24, 2018

Overpriced na face mask, ireport sa DTI

Photo courtesy of Mayor Ann Gemma Ongjoco of Guinobatan, Albay

ni Vince Villar

Legazpi City – Nag-aviso an Department of Trade and Industry (DTI) Bicol sa mga residenteng napabakalan nin mga overpriced na face mask na magreport sa saindang opisina ngani na maaksyunan.

Segun kay Ms. Bhem Beranggo, tagapagtaram kan ahensiya, pag aadalan ninda base sa Consumers Act of the Philippines kung anong sanction an pwede nindang ipataw sa mga nagtitinda nin siring na produkto sa panahon nin kalamidad.

Sinabi kaini, na maski bako parte kan prime commodities an face mask, importante ining proteksyon sa salud kan mga naapektaran kan ash fall na dara kan pagtuga kan bulking Mayon kun kaya dae pwedeng aprobitsaran ini kan mga negosyante.

Sa presente, pigpapahiro na kan DTI an saindang monitoring team ngani mabantayan an kasong ini.

Miyentrastanto, nagpagirumdom man si Beranggo na nagtitinir nan aka price freeze ngonyan an mga pangenot na barakalon huli sa deklarasyon kan State of Calamity sa Albay.

Paliwanag kn opisya, dagkod na dae pigbabawi nin amay, madurar nin sagkod 60 aldaw an price freeze.

An mga produktong sakop kan pagpugol sa paglangkaw kan presyo iyo an mga delata, asin, kape, evaporada, condensada, powdered milk, powder and bar soap, bottled mineral water, asin noodles.
Share:

Featured Post

Give the gift of creativity with Arog Kaito art fair in Daet!

DAET, Camarines Norte (Bicol Standard) -- Bicol Standard is a proud sponsor of a two-day art fair featuring the finest young creatives of...