Thursday, January 18, 2018

Klase sa ibang evacuation centers sa Albay, nag resume na ngonyan na aldaw


Legazpi City - Pinunan na kan nagkapirang eskwelahan, na ginibong evacuation centers kan mga residenteng naglikay sa peligro kan pagtuga kan Mayon sa Albay, an klase ngonyan na aldaw nin Huwebes, Enero 18, 2018.

Sa intrivista kay Kevin Arroco, saru sa tagapagtaram kan DepEd Bicol, sinabi kaining kanya kanyang implementasyon an mga School authorities sa pagbubukas nin emergency classes ngonyan na aldaw, alagad, bako pa man enterong 33 na mga eskwelahan na inukupar kan mga evacuees.

Paliwanag ni Arroco, may mga bako man grabe an bilang kan mga evacuees kaya madali na nakapag-resume kan klase alagad su iba, depende sa bilang kan ukupadong classrooms, may duwa sagkod tulong shifting kan klase na mangyayari kada aldaw.

May mga eskwelahan man arog sa mga banwaan kan Sto Dominggo asin Malilipot na kusang sa luwas nag-giribi nin makeshift houses o payag an mga evacuees kun kaya nakabwelo pa an klase.

Sa San antonio Elementary School a Malilipot, nagpa contest pa an principal sa mga evacuees kung sisay an may pinakamalinig na kwarto iyo an tatawan nin premyo o insentibo.


An ibang eskwelahan an dae man suboot nadipisilan huli ta may dati ng mga Tents na tinao kan UNICEF pa kaito na magagamit bilang Temporary Learning Spaces (TLS).

May mga dati naman na napatugdok alagad pwede pang gamiton sa ngonyan.

An problema sana suboot ninda ngonyan iyo an mga blackboards para sa mga TLS na ini.

Sa ngonyan, nagdidispuner na an DepEd para sa pagkua kan siring na mga gamit.

May proposal naman an DepEd Bicol ngonyan para maghagad pondo sa mga LGUs asin OCDS ngani na magpagibo nin 208 na mga TLS sa bilog na probinsiya na magastos nin kinakarkulong P17.7 million.

Apwera kaini, mahagad man donasyon an DepEd sa sisay man para sa mga hygiene kits asin cleaning materials na kinakarkulong abuton sa labi un milyones de pesos man.

Mahurot pa an ahensiya na magsagibo nin psychological first aid para sa 16,791 learners asin 319 personnel ninda na naapektaran kan pagtuga kan Mayon.

Sa presente, abuton sa 8, 583 pamilya o 33, 064 na individual an yaon nag uukupa sa 33 na eskwelahan o 445 na classrooms kan DepEd.

Apwera sa 33 na dae makaklase nin tultol huli sa mga evacuees, may 17 na eskwelahan pa na dae magamit an DepEd huli ta laog ini sa 6kms PDZ asin 7kms extended danger zone. (Vince Villar)

Share:

Featured Post

Give the gift of creativity with Arog Kaito art fair in Daet!

DAET, Camarines Norte (Bicol Standard) -- Bicol Standard is a proud sponsor of a two-day art fair featuring the finest young creatives of...