Thursday, January 18, 2018

Gov. Bichara kay Pres. Duterte: “Pagkatiwalaan niyo kami!”

Mayor Noel Rosal, Gov. Al Francis Bichara, Atty. Harry Roque

Legazpi City - “Pagkatiwalaan niyo kami!”

Ini an naging maduon na pakihuron ni Gobernador Al Francis Bichara kay Presidente Rodrigo Duterte katakod kan hinahagad kaining asistensiya para sa mga residenteng apektado kan pagtuga kan Bulkan Mayon sa Albay.

Sa Malacanang Press briefing na ginibo kasubago ni Presidential Spokeperson Harry Roque kaiba si Bichara, Ipinaliwanag kan Gobernador na siya asin an mga Alkalde kan 8 mga Munisipyo asin Siyudad sa Albay an pare parehas an dinadanas na kadipisilan sa pagpapaluwas kan saindang mga 5% Calamity Fund.

Sinabi ni Bichara na sa bulan na ini wara pang ibinababa na pondo sa sainda.

Aram suboot ni Pres. Duterte bilang dati man na Local Chief Executive an kamugtakan na ini kan mga lokal na gobyerno na naka dependeng maray sa IRA o Internal Revenue Allotment.

Kun mahalat pa suboot sa bearucratic process kan gobyerno, baad tapos na an gabos, saka pa sana maitatao an pondo.

Ipinagirumdom ni Bichara an ginibo kaito ni dating Presidente Joseph “Erap” Estrada kan taong 2000, na tulos pinermahan an sarung checke asin tinao tulos sa mga LGUs an tabang.

Suboot, katwiran kaito ni Erap, accountable man an mga LGUs sa pondong ipinagkatiwala sainda, kaya bahala na an mga ini.

Iyo ngonyan an gustong mangyari ni Bichara ngani na marikas na matawan nin tabang an nasa haros 40 mil ng evacuees.

Sa nakalipas na limang aldaw na nin pagtiner sa evacuation centers, tig 3 kilos pa sana nin bagas na inutangan sa NFA, an naitatao kan LGU Albay sa mga Evacuees.

Apwera kan pagkakan, problema pa ngonyan an pagpagibo nin mga Temporary Learning Spaces (TLS) kan sobra 16 mil na mga estudyanteng nadistorbo an klase huli ta ukupado kan mga evacuees an saindang classroom.

Sa ngonyan nangangaipo nin 208 na TLS para sa tulong Schools division na apektado kan kalamidad.

Tinawan doon kan gobernador na dapat makua na ninda an pondo para makapagibo nin TLS sa urog na madaling panahon huli ta dae dapat madistorbo maray an klase kan mga aki. 

Sa naging reaksyon ni Atty Roque, simpleng sinabi kaini na makaka abot kay Duterte an hurot kan gobernador. (Vince Villar)
Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...