Thursday, January 4, 2018

Dredging sa mga salog kan Legazpi City, solusyon ngani gumana an mga pumping stations


LEGAZPI CITY 1/4/18 (Bicol Standard) -- Dredging o pagkalot kan mga salog an nahihiling na solusyon kan LGU- Legazpi City asin kan DPWH ngani na gumana na an tulong mga pumping stations na pinondohan nin P2.1 billion pesos kan gobyerno nasyunal.

Segun kay Alkalde Noel Rosal, dae man nin diperensiya an nasabing ekipahe alagad dae nagrararom an tubig sa mismong kinamumugtakan kaini o dae nakaka abot sa kinakaipuhang lebel nin tubig baha kun kaya dae ini mina andar.

Sa madaling sabi, barado an mga agihan kan tubig baha pasiring sa pumping station.

Kun babalikan, nagka duwang beses ng nagka igawa nin babaha sa Siyudad nin Legazpi, enot kan Dec 29, 2017, ikaduwa, kasuudma sana, alagad dae man napakinabangan an nasabing flood control project.

Paliwanag ni Rosal, dara kan pagbara, minabwelta an baha sa hababang lugar sa sentro kan Legazpi kun kaya dae nakaka bulos diretso sa kadagatan.

An resulta, lubog sa baha an kadaklan na baranggay urog na an mga nasa gilid kan salog.

Dahilan kaini, nagrequest na suboot si Rosal sa DPWH na magsagibo nin dredging sa mga salog.

Habang ginigibo ini, tatrabahuhon man kan Local na gobyerno an paghali sa mga nakaka ulang sa salog partikular an mga kaharungan.

Napag araman na pipa tapyasan nin sagkod na 30 metros an mga istruktura sa mga gilid kan mga salog, alagad, dara kan pagka herak, 10 metros na sana an pighuhurot kan Alkalde.

Apwera digdi, sisikapon man suboot ninda na mahali an mga nakabarang basura sa mga drainage asin maibitaran na may magtapok pa digdi.

Kadaklan sa mga drainage sa Legazpi an bako pa kurunektado kun kaya saru pa ini sa tatawan nin prayuridad sa paagi kan City Engineering Office.

Tatapuson man gabos na mga dike projects para mairayo sa peligro an mga residentes.

Inako kan Alkalde na dipisilon labanan an climate Change na iyo an minapabaha nin grabe sa siyudad alagad pagsisikapan na makagibo nin mga medyos ngani maka ibitar sa peligro.

An pumping stations sa Legazpi an pinakadakulang flood control project na pinondohan kan administrasyong Aquino sa luwas kan metro Manila.

May tulo ining istasyon sa mga costales na brgy kan Victory Village, Baybay asin San Roque. (Vince Villar)

Share:

Featured Post

Treasurer's Office kan Prieto Diaz, Sorsogon sinalakat; P755 k an cuartang nawara

SORSOGON - Sinalakat nin dai bistong tawo an Municipal Treasurer's Office (MTO) kan Prieto Diaz, Sorsogon, asin nahabon an kantidad...