Wednesday, January 31, 2018

Dagdag na P50M na tabang ni Pres Duterte sa Albay, itinao na

Retrato hale ki Rhondon Ricafort, kua sa Dignitaries' Hall, Governor's Office, Albay Capitol Building
Legazpi City - Tulos na pinadara ni Presidente Rodrigo Duterte sa paagi kan saiyang Presidential Management Staff an ipigpromisa kaining dagdag na P50 million na tabang para sa mga evacuees sa Albay.

Kun babalikan, Enero 29, Lunes, kan magbisita an presidente sa Albay ngani personal na aramon an kamugtakan kan mga biktima kan pagtuga kan Bulkang Mayon.

Sa aldaw na ini, itinao niya kay Gobernador Al Francis Bichara an P20 million na kantidad nin cheque asin may dagdag pang P5 million hali sa PCSO sa paagi ni Board Director Sandra Cam.

Dae nakuntento sa P5 million kaya pinapadagdagan niya pa ini nin P25 million kay Sandra Cam.

Nagsabi pa si Duterte na madagdag pa siya nin P50 million ngani matutukan an mga pangangaipo kan mga evacuees lalo sa Pagkaon, sanitasyon, asin sa Salud.

Kasuudma, Enero 30, tulos na pinaluwas kan Office of the Deputy Executive Secretary for Finance and Administration (ODESFA) an nasabing kantidad.

Ngonyan na aldaw, Enero 31, personal na pig abot ni PMS Head Amber Mirandilla kay Gobernador Bichara an checke sa mismong opisina kaini sa provincial Capitol.

Kun magigirumuduman, sa enot na semana kan pagtuga kan Bulkan, nangapudan kaito si Bichara sa Malakanyang na pagtiwalaan sinda nin pondo ngani na maasikaso an problema kan mga evacuees.

Sinabi kaini na kan 2000 eruption, sa panahon ni Presidente Joseph Estrada, makaskas na nagpadara nin tabang an gobyerno nasyunal sa paagi kan sarung pirma sana sa cheque kan presidente.

Share:

Featured Post

Give the gift of creativity with Arog Kaito art fair in Daet!

DAET, Camarines Norte (Bicol Standard) -- Bicol Standard is a proud sponsor of a two-day art fair featuring the finest young creatives of...