Sunday, January 14, 2018

Bulkang Mayon, tinaas na sa level 2 an Alerto


Retrato hale sa Phivolcs


Legazpi City - Huli sa nangyaring phreatic eruption kasuudmang hapon, Jan 13, 2018, itinaas na kan Philvolcs an alerto kan bulkan Mayon kasubagong 12:30 nin mag agahon, Jan 14, 2018.

Paghali sa Alert level 1 (Abnormal), itinaas ini sa Alert level 2 (increasing unrest)

An nasabing pag tuga nin abo an uminabot sa 2500 meters an langkaw asin itinalbo ini sa Sourhwest na porsyon kan bulkan.

Base sa seismic activity, nagpuon an eruption alas 4:21 nin hapon asin nag durar nin 1 oras asin 47 minutos.

Naapektaran kaini an mga baranggay kan Anoling, Sua, Quirangay, Tumpa, Ilawod asin Salugan kan Camalig; Barangays Tandarora, Maninila  Travesia kan Guinobatan. 

Nakaparong man nin Sulfur an mga residentes kan sentro nin Camalig. 

Apwera kaini nakadangig man nin garu mga dalugdog sa irarom kan daga an mga residentes kan Brgy. Anoling, Camalig. 

Puon kan pagtuga nakapag record man nin mga rockfall events sagkod kan ipaluwas an bulletin kasubago.

Naobserbahan man an dikit na pagkalayo kan crater kasubangging bandang alas 10:16.

Antes man an pagtuga nahiling man an paghubag kan Edifice kan bulkan na indikasyon kan pagkakaigwa nin ground deformation puon kan October sagkod November 2017.

Naghubag man an puro kan bulkan na dara kan pagkusog nin pressure na iyo an nagpasakat kan magma o kan regular na hydrothermal system kaini.

Dahil digdi, dakula an posibilidad na magkaigwa pa nin mga phreatic eruptions sa mga masunod na aldaw o kaya mag abot sa mas matinding magmatic eruptions.

Dahil digdi, higot na ina avisuhan an publiko na maging mahigmat asin likayan nanggad an paglaog sa 6kms-radius Permanent Danger Zone (PDZ) ngani maiwasan an peligrong hatod kan biglaan na pagsabog, rockfalls asin landslides.

En caso magkaigwa utro nin ash fall sa mga yaon sa western asin southwesern na parte kan bulkan dapat na takluban an mga dungo nin dust mask o tela na dinumog nin tubig.


Pinagirumduman man kan Philvolcs an Civil aviation authorities na avisuhan an mga piloto kan eroplano na likayan an pagpapalayog harani o sa ibabaw mismo kan crater kan bulkan.

Miyentrastanto, alas 8:00 atdyan makikipagmeeting an Albay PDRRMC sa PHILVOLCS asin base sa resulta, pag aadalan kun papabalikon na muna sa saindang mga residensiya an ginatis na mga pamilya sa Camalig asin Guinobatan na pina ebakwar huli sa Ash fall.

Segun kay Dr Cedric Daep, ma istrikto sana sinda sa pagbabawal kan anuman na aktibidad kan tawo sa laog kan 6kms PDZ mantang naka alerto sana pirmi an mga yaon sa luwas kaini. (Vince Villar)

Share:

Featured Post

Masbate OKs FOI ordinance

Masbate Sangguniang Panlalawigan Photo courtesy of Vice Gov. Kaye Revil MASBATE CITY (Bicol Standard) – The Province of Masbate has app...