Wednesday, January 3, 2018

APSEMO, nagpaliwanag sa dae pagsuspindir kan klase sa ibong kan uran sa Albay

TD Agaton

LEGAZPI CITY 1/3/18 (Bicol Standard) -- Nanindugan an Albay Public Safety and Emergency Management Office o APSEMO na tama sana man an desisyon nindang dae magpaluwas nin suspenson order kan klase sa bilog na probinsiya huli ta wara sindang nahihiling na peligro sa uran na nadadanasan ngonyan na aldaw.

Segun ki Dr. Cedric Daep, base sa saindang pag analisar kan sitwasyon sa palibot, dae man madulot nin baha an dikit an uran huli ta nag aabot sana man ini sa 2 millimeter kada hora.

Nakahuron niya suboot si Gobernador Al Francis Bichara asin an rekomendasyon iyo an magkaigwa nin localized advisory na sana an kada munisipyo asin syudad.

Sa bilog na probinsiya, Manito asin Sto Domingo sana an nagdeklara nin no classes sa gabos na lebel matapos ma isolate dahil sa pag rumpahog kan daga sa tinampo na sakop kan Brgy Malobago.

Tulos man na sinuspinder puon kasuudma an biyahe kan mga public utility vehicles na nagbabyahe Legazpi-Manito vice versa.

Kasubagong alas 5 nin aga, pinunan na kan DRMM team kan DPWH 2nd District Engineering Office an clearing operation kun kaya kasubago lang na alas 11 ni aga, lifted na an suspension kan byahe kan mga public utility vehicle.

Segun ki Joebert Daria, MDRRMO kan Manito, sa gabos na lugar sa Manito, an brgy Malobago an pinaka apektado kan landslide kun kaya nagpasugo na si Mayor Daep sa brgy captain kan lugar na magsagibo na nin evacuation kun kinakaipuhan.

Nilinaw man tulos ni Daria na mantinido pa man giraray an suspension kan klase sa bilog na banwaan.

Bawal man muna an pagpasyar sa mga tourist spots ngani makalikay sa aksidente.--ni Vince Villar
Share:

Featured Post

LGU Naga City, stricto sa mga paputok

NAGA CITY (Bicol Standard) -- Pig orolayan kan mga oficial kan LGU Naga asin an 27ng Punong barangays kan Ciudad an mga estratihiya par...