Tuesday, January 23, 2018

Albay, nakapreparar na sa worst scenario kan Mayon


Legazpi City - Dae na naghahalat nin aviso hale sa Phivolcs an Albay PDRRMC na magtaas nin Alert Level 5 antes ninda pa ebakwaron an mga residentes na nasa 9kms extended danger zone.

Ini matapos na makaparehistro nin sunod sunod na ash explosions asin lava flow and fountaining an bulkan sa nakalihis na 24 oras.

Sa intrivista kay Dr Cedric Daep, Chief kan Albay Public Safety and Emergency Management Office - APSEMO, sinabi kaini na nahihiling na ninda gabos na senyales kan matinding peligro na pwedeng ihatod kan Mayon kun kaya nagpasugo na siya nin forced evacuation sa mga nasa laog kan nasabing distansiya.

Sa Legazpi City, duwang brgy na an dinagdag sa mga inibakwar ngonyan sanang alas 9:00 nin aga, mantang an Guinobatan, nagpa ebakwar naman sa dagdag na apat na brgy.

An Camalig, enot ng nagpa ebakwar kan mga residentes sa gabos na baranggay na yaon sa sentro.

Maging an mga naka ebakwar sa laog kan 8 kms danger zone, pig relokar giraray sa mas harayo asin salbadong lugar.

An banwaan kan Daraga, 2 pang brgy an dinagdag sa ipapa ebakwar mantang saru man sa Sto Dominggo, Albay.

Sa Ligao City, duwang sitio sa duwang brgy man an pina ebakwar sa sentro.

Dahilan kaini, maabot na sa sobra 40,000  na persona an mga nasa evacuation centers sa 3 na Siyudad, asin 7 Munisipyo.

Segun sa mga Local DRRMOs kan mga apektadong lugar, kasya pa man sa 2 sagkod 3 aldaw an saindang mga relief assistance.

Miyentrastanto, Pinaka nakaka apekto ngonyan sa mga residentes iyo an ash fall paghali sa Camalig, sagkod 3rd district kan Albay o South West Quadrant kan Bulkan huli sa paros amihan.

May mga pagkakataon na zero visibility an mga tinampo huli sa hibog kan abo.

An mga residentes na daeng mga facemask an inavisuhan na maggamit nin mga tela na dinumog bilang pantaklob nin dungo.

Maski siring kaini, wara pa man nin nairereport na naospital huli sa pagpiot kan paghangos dara kan napaparong na abo.

An mga BFP personnel kasabay an saindang mga firetrucks an nag ikot na ngai dugdugon an tinampo na napano nin abo.

Sa ibong na lado, suspendido an klase sa gabos na lebel sa mga syudad kan Legazpi asin Ligao, munisipyo kan Sto Dominggo, Daraga, Camalig, Guinobatan, Oas, Polangui mantang an ibang lugar an nasa discretion na sana kan mga Alkalde.

Suspendido man an byahe kan mga eroplano sa Legazpi City Airport kabale na an Naga City Airport huli kan epekto kan abo. (Vince Villar)
Share:

Featured Post

Catandungan Festival 2018: Celebrating 73 years of Independence

The Catandungan Festival is celebrated every October to commemorate the foundation anniversary of Catanduanes as a province independent...