Monday, January 15, 2018

Albay, madeklara nin State of Calamity ngonyan na aldaw


Legazpi city - Madeklara nin State of Calamity ngonyan na aldaw, Enero 15, 2018 an Albay katakod kan pag aburido kan bulkang Mayon na ngonyan itinaas na sa Alert level 3 kan PhilVolcs.

Sa intrivista kan Bicol Standard kay Dr. Cedric Daep kan Albay Public Safety and Emergency Management Office o APSEMO, sinabi kaini na paagi an nasabing deklarasyon ngani maka utang muna nin mga bagas sa National Food Authority o NFA na iaayuda sa mga nag ebakwar na mga residentes.

Paagi man ini ngani magamit na kan kanya kanyang LGU’s an saindang mga naka standby na 5% Calamity fund na dae nagamit kan naka-aging taon.

Sa ngonyan, nag aabot na sa haros 6 mil na persona an mga nasa evacuation centers makalihis gibuhon kasuudma an preemptive evacuations sa gabos na mga baranggay na yaon sagkod sa 8kms extended danger zone.

Segun kay Daep, dae masisiguro an pagtiner sa evacuation centers kan mga tawo kun wara nin itataong ayudang pagkakan an gobyerno.

Sa ngonyan, dae pa makapaluwas nin pondo an mga LGUs matapos magsara nin account ninda para sa taong 2017 mantang dae pa nairerelease an mga Internal Revenue Allotment o IRA para sa taong 2018.

Nilinaw ni Daep na igwa pa man nin milyones na Calamity Fund an probinsiya alagad 30% sana kaini an kukuahon para sa food assistance.

Miyentrastanto, nagpuon na kasuudma na magsagibo nin assesment sa mga evacuation centers an PDRRMC ngani makapreparar nin report na magagamit sa paghagad nin donasyon sa mga Nasyunal asin Internasyunal na mga organisasyon.

Segun kay Daep pinalibot na ninda an mga personahe kan Provincial Engineering Office asin Provincial Health Office ngani hilingon an availability kan mga facilidades arog kan toilet, karigusan, asin water sources.

Pakatapos kaini, masurat an gobyerno provincial sa UNICEF, UNDP, AECID asin iba para para makahagad tabang.

Plano man ni Daep na mag organisa nin Donors Forum sa Manila kun kakaipuhanon para bumulos pa an donasyon.

Share:

Featured Post

14ng pasahero sa jeep na nahulog sa Tinambac, salbado na

TINAMBAC, CSur - Binasol ni Municipal Councilor Jonas Soltes an Department of Public Works and Highways (DPWH) sa saindang kapabayaan n...