Wednesday, January 17, 2018

Albay, isinairarom na sa State of Calamity


Legazpi City - Nagkasararong inaprubahan kan mga miyembros kan Sangguniang Panlalawigan kan Albay an resolusyon na minadeklara sa Albay sa irarom kan State of Calamity kasoodma Enero 16, 2018 dahil sa padagos na pag alburuto kan bulkan.

Si Liga ng mga Barangay President JP Lee, Chairman kan Committee on Crisis and Emergency Management, an nagbusol kan nasabing resolusyon.

Dahilan kaini, makakabwelo na an PDRRMC sa paggamit kan 5% Calamity fund ngani maipang ayuda sa sobra 20 mil na mga residentes na nasa mga evacuation centers na ngonyan.

Sa naging presentasyon ni Dr. Cedric Daep kan APSEMO, sinabi kaini na igwa pang sobra P90 million na pondo para sa kalamidad an Albay.

30 percent kaini an mapapasiring sa food assistance mantang an iba an magagamit sa pagpakaray kan mga facilidades kan mga evacuation centers arog kan mga toilet asin water system.

Alagad, tulos na nilinaw ni Daep na sagkod 10-15 days sana an idudurar kan pondong ini asin an masunod na lakdang iyo an maghagad na nin pondo sa Nasyunal asin mga international na organisasyon.

Sinabi ni Daep na oras na kapuson nin pondo, tulos nindang ipapadeklarang depleted na an pondo ngani makahagad ayuda sa Nasyunal.

Miyentrastanto, nihayag ni Daep na poon ngonyan nagbubulos na an tabang hale sa ibang mga probinsiya sa rehiyon.

An Catanduanes asin Sorsogon an mapadara na suboot nin saindang mga water purifying machines sa aga.

Apwera kaiyan, nagrequest naman sinda sa coordinator kan AECID ngani darahon sa Albay asin ipagamit an 3 mga units kan purifying machines sa Clark, Pampangga.

An DSWD asin Phil Red Cross an nakipag koordinar naman sainda ngani magtabang, mantang an NFA an enot ng nagpautang nin sobra un mil na sako nin bagas ngani may maidistribwer na sa mga evacuees.

Masurat man si Daep sa gabos na mga dati ng international partners siring kan UNDP, UNICEF asin iba pa ngani magpadara nin tabang mantang kun kinakaipuhan pa, makunduser siya nin donors forum sa Metro Manila.

Paliwang ni Daep, bako siring kan bagyo o iba pang kalamidad, posibleng maghaloy an mga tawo sa mga evacuation centers huli ta dae sigurado kun sa arin makulpa an pag alburoto kan bulkang Mayon. 

Sa presente nasa 6,459 na pamilya o 24,752 na persona an inebakwar hale sa 29 mga baranggay na gikan sa 6kms PDZ asin 8kms extended danger zone.

Sagkod ngonyan nasa alert level 3 pa an bulkan. (Vince Villar)
Share:

Featured Post

Give the gift of creativity with Arog Kaito art fair in Daet!

DAET, Camarines Norte (Bicol Standard) -- Bicol Standard is a proud sponsor of a two-day art fair featuring the finest young creatives of...