Wednesday, January 31, 2018

3 mga pushers, dakop sa Albay


ni Vince Villar

Legazpi City - Arestado an tulong pigsususpetsarang mga drug pushers matapos an isinagibong magkakahiwalay na anti drug operation kan Philippine National Police (PNP) kasuudma sa Albay.

Alas 2:50 kasuudma, enot na naarestar sa paagi kan buybust operation iyo si Isagani Chavez y Guevarra, 36 anyos kan P-4, Bgy. San Roque, Tabaco City.

Nakua sa saiya an sarung heat sealed transparent sachet na naglalaman nin suspected shabu mantang nabawi man an 500 peso bill na ginamit na marked money.

Kasabay haos kan operasyon na ini an nadakop man sa buybust operation sa banwaan kan Tiwi na si Desiderio Cuadro u Cantor a.k.a Gart, 36 anyos, may agom, sarung photographer asin residente kan Brgy Tigbi, kan nasabing banwaan, kun saen duman man siya nadakop.

Nakua man saiya an sarung sachet nin pigtutubudang shabu.

Bandang alas 4:20 nin hapon kan isirbi man kan pulisya kan Tabaco City an Search Warrant kay Rene Burac y Bobiles, 38 anyos, kan P-4 Brgy San Roque.

Positibong nakua sa saiya an 10 sachets nin suspected shabu asin mga drug paraphernalia.

An 3 suspetsado an nasa kustudiya kan kanya kanyang hepatura kan pulisya asin nakatalaan na isairarom sa inquest proceedings ngonyan na aldaw.

Sa kabilugan, puon kan ibalik kan Disyembre 5, 2017 an operation tokhang kan PNP sa Albay, 16 na an mga naarestar mantang 5 na an nagsurrender.

Sa kabikolan, 96 an naarestar mantang 16 pa sana an nag surrender.

Nangengenot pinakadakol na naarestar iyo an Camarines Norte na may 28 na asin sinundan kan siyudad nin Naga na may 27 na.
Share:

Featured Post

Catandungan Festival 2018: Celebrating 73 years of Independence

The Catandungan Festival is celebrated every October to commemorate the foundation anniversary of Catanduanes as a province independent...