Friday, January 5, 2018

25 kilos nin Cocaine, pigsusupetsarang hali sa sarung taiwanese vessel na naglubog sa Northern Samar

24 kilos nin cocaine, pigsusupetsarang hali sa sarung Taiwanese vessel
(Kua ni Vince Villar)
LEGAZPI CITY -- Nagsususpetsa an mga otoridad na hali sa sarung taiwanese vessel na luminubog sa Northern Samar an P125 million na kantidad kan cocaine na nakua kan sarung parasisira sa sarung tourist spot sa Matnog, Sorsogon.

Magigirumduman na kan January 3, 2018 o Miyerkules nin Hapon, nakua kan parasirang si Robert Galvez y Frado, kan Brgy Calintaan, an sarung kolor blue na container na naglalaman nin mga nakapack na mga cocaine, sa laog kan Juag Lagoon, sarung lugar na pig aatamanan nin mga 1st class na sira asin dayuhon man kan mga turista huli ta agihan ini pasiring sa Subic Beach.

Sa Presscon na ginibo sa laog kan Camp Gen Simeon Ola sa Legazpi City, inihayag ni Pol Chief Supt Antonio Gardiola, Regional Director kan Police Regional Office 5 (PRO-5), na kan January 2, 2018, sarung Taiwanese Vessel, na may pangarang Jing Ming 16, an nagpaabot nin distress call sa Coastguard matapos na abuton nin raot nin panahon sa kadagatang sakop kan Pambuhan, Northern Samar.

Luminubog an nasabing barko alagad Antes na nasapod an mga crew, nahiling suboot na inurula sa kadagatan an ibang mga lunad na kontrabando.

Sa ngonyan pugol na kan mga otoridad sa Region 8 an 9 na narescue na mga crew na kinababalihan nin 6 Chinese, 2 Hongkong National, asin 1 taiwanese.

Pigpaplanuhan na ngonyan na magsagibo nin search operation an laog kan barko kun makakaya pang sisidon ini ngani maaraman kun ano nanggad an mga kargamento kan mga ini.

Segun kay Gardiola, nakipag koordinar na suboot an gobyerno kan PIlipinas sa Taiwan, kung saen, napag araman na sarung Ghost Vessel an nasabing barko o nangangahulugang undocumented ini.

Dahil digdi kun kaya nagkusog an pagtubod kan PNP asin PDEA na posibleng hali man nanggad digdi an nakuang mga Cocaine sa Matnog, SOrsogon.

Katakod kaini, nagpaluwas naman nin aviso an PNP sa mga parasira sa palibot kan kadagatan kan Northen Samar sagkod sa Bicol na mag osep tulos sa sainda pag may nanutarang mga kargamento na nagpapataw pataw.

Naglilibot naman ngonyan an Phil Navy katabang an phil Airforce para sa posibleng pagkakarecover kan iba pang kontrabando

Miyentrastanto, nagtutubod an Phil Drug Enforcement Agency o PDEA Bicol na bako sa PIlipinas planong ibagsak an nasabing mga droga.

Segun kan Director Christian Frivaldo, mga high end drugs an nakua asin dae man ini kayang bakalon kan mga ordinaryong mga Pilipino.

Sa bilog na nasyon, 1 to 2 porsyento sana kan mga Pinoy an naggagamit nin drogang ini huli sa labing kamahalan bakong siring kan Shabu na inaapod man na Poorman’s Cocaine.

Sa pagkakarkulo kan PDEA, nasa P5 milyones an kantidad kan kada bulk o Kilo kan nakuang Cocaine alagad triple pa an presyo kaini kun ipapabakal na sa mga users.

Bako siring kan shabu, na an sarung kilo, makantidad sana nin P5 milyones pag naka abot na sa mga users.

Nagtutubod si Frivaldo na hale nin Latin America o kaya man Brazil an mga Cocaine na nakua base sa packaging o labeling kan droga.

Sa ngonyan nasa pangangataman kan Regional Crime Laboratory an mga Cocaine ngani na darahon sa Camp Crame para ipa test an purity kaini.

Matapos kaini, saka pa sana ididispatsa ngani rauton sa paagi kan incinerator o pagsulo.

Segun kaya kay Director Frivaldo, dae nararaot an Cocaine kan simpleng paglublob sa tubig o pagtalbong sa daga kun kaya pwede pa ining i-recycle. (vince Villar)
Share:

Featured Post

Use money wisely, UltraLotto 6/58 winners told

Philippine Charity Sweepstakes Office (PCSO) General Manager Alexander Balutan has advised the two lucky winners of the P1.1 billion to u...