Friday, January 19, 2018

10 NPA, nagsuko sa Albay


Daraga, Albay - Sampulong mga aktibong miyembro kan mga rebeldeng New People’s Army (NPA) an suminuko sa tropa kan militar sa probinsiyang ini.

Sa intrivista kan Bicol Standard kay Capt. Jomar Clavel, Civil Military Operation Officer kan 901st Brigade, Phil. Army na nakabase sa Villa Hermosa, Daraga, an sampulong mga rebelde an kumpwesto kan 4 na babae, asin 6 na mga kalalakihan.

4 suboot sa mga ini an taga Daraga, 3 an mga taga Legazpi, 2 an taga Sorsogon, mantang 1 an gikan sa Camsur.

1 sa mga ini an sqauad leader, 1 political guide, asin duwang medic.

Kasabay sa pagsuko kan mga ini an mga de kalibreng armas siring kan 3 na M16, 1 na 12 gauge na shot gun, 1 na M79 grenade Launcher, mga Improvised Explosive Device o IEDs, mga bala, asin subersibong mga dokumentos.

Segun kay Capt. Clavel, nahahandal na suboot kan saindang mga buhay an mga rebeldeng ini sa buhay ninda kaya nagsuko na.

Maidadagdag pa suboot digdi an padagos na panloloko kan saindang mga lider mantang sinda an nagsasakripisyo asin nahahampang sa peligro.

Huli kan saindang pagsurender, nakarisibi nin incentibo an mga ini mantang isasairarom pa sa CLIP o Comprehensive Local Integration Program kan gobyerno ngani matawan nin tabang kabuhayan sa saindang pagbabagong buhay.

Sa ngonyan, yaon una sinda sa pangataman kan militar ngani masiguro an saindang salbasyon laban sa mga aktibo pang mga pag iriba.

Sa kabilugan, sa karkulo ni Capt Clavel, nasa 100 pa suboot na pwersa kan NPA an yaon ngonyan sa Albay.

Katakod kaini, padagos an pangapudan ni Brigd. Gen. Alden Juan Masagca, commander kan 901st  brigade, sa mga rebelde na magsuko na huli ta bukas palad nindang aakuon an mga ini. (Vince Villar)

Share:

Featured Post

Catandungan Festival 2018: Celebrating 73 years of Independence

The Catandungan Festival is celebrated every October to commemorate the foundation anniversary of Catanduanes as a province independent...