Friday, December 1, 2017

Naghabas nin motorsiklo, nadakop sa Bato, CSur



NAGA CITY 12/1/17 (BICOL STANDARD) –Tulong lalaki na suspechado sa pag-carnap nin motorsiklo an inarestar (citizen’s arrest) kan an saindang hinabas na vehiculo mag-simplang sa may riles kan tren sa rail road crossing sa Barangay San Miguel, Bato, Camarines Sur.

An incidente nangyari kasubagong alas 3:00 nin mag-omagahon.

Segun sa report kan pulis an tulong suspechado sa pag carnap nin motorsiklo iyo sinda Ruben Solano y Pelicia, taga Anoling, Camalig, Albay, Jeffrey Moyo y Guiriba, residente kan Salugan, Camalig, Albay asin sarong menor de edad na nabisto sa pangaran na Alex, taga Barangay Anoling, Camalig, Albay.

Hinabas an motorsiklo sa Barangay Agos, Polangui, Albay.

Sabi sa report kan mga awtoridad, an tulong suspechado sa pag carnap kan motorsiklo na-aksidente kan sinda magbaktas sa riles kan tren sa Barangay San Miguel, Bato, Camarines Sur.

Nin huli sa pagtubod na hinabasan an motorsiklo kaya inarestar an tulo na mga suspechado.

Alagad, nin huli ta may mga rungas sa saindang lawas an duwa sa mga suspechado kaya idinalagan sinda sa hospital para ipabulong.

An ika tulong suspechado an dinara sa pulis tanganing imbestigaran.

Mientrastanto, an motorsiklo yaon ngonian sa poder kan mga awtoridad.

Pig pepreparar na kan mga awtoridad an pag sangat nin caso contra sa mga imbuelto sa casong ini.
Share:

Featured Post

Bicol Central Station to launch online booking and payment portal this week

NAGA CITY (Bicol Standard) – The Bicol Central Station will launch on August 23 its Online Booking and Payment Portal as part of the st...