Sunday, December 3, 2017

2 gadan, 1 irido sa saraksakan sa Catanduanes

'

VIRAC, Catanduanes 12/3/17 (BICOL STANDARD) –Duwa an gadan, sarong irido sa burolyadang nangyari sa baylehan sa Barangay Buenavista, Caramoran, Catanduanes kasubagong mag-omagahon.

Nagpoon an burolyada kan saksakon ni Elvie Castor y Pamplona, si Sunny Fernandez y de Leon, na mga residente kan kapareyong barangay.

Mortal na tama kan lansetas na ginamit ni Castor, sa pagsaksak ki Fernandez, kaya binawian tulos an victima nin buhay.

Mantang na-gagaotan nin kutsilyo an lawas ni Fernandez, duminulag na si Castor, na biyong nagsasarisid an lakaw, huli sa makuring kaburatan.

Kagsing asin siwik nin mga tawo an biyong nag-alingawngaw sa baylehan sa Plaza.

Pirang minutos sana an nakalihis, may saro pang palna nin mga tawo an liwat nagburolyada, asin sinaksak an saro pang lalaki, na nabisto sa pangaran na Noli Coral, 21 anyos an edad.

Si Coral taga Barangay Maysuram, sa Caramoran

Mientrastanto, kan magliwanag na an lugar pakatapos na saraksakak, sa distanciang 100 metros hale sa plaza kan barangay, naheling an nakabulokon na lawas ni Castor, si nagsaksak ki Fernandez na tad-tad man nin tama nin saksak.

Afuera kan mga lugad nin saksak, pinasa pa an saiyang payo, kaya siya tulos naotsan.

Si Noli Coral pig bubulong pa ngonian sa hospital.

An mga imbuelto sa pangyayaring ini, anas mga parahagot nin abaca.

Sa ibong na lado, an mga imbestigador nag sisiyasat pa kan incidente, para maisangat an mga caso sa mga responsable sa krimen.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...